އިނގިރޭސި ޕްރީމިއަރ ލީގުގައު ޗެލްސީ ރޭގައި ބްރެންފޯޑް އާއި ދެކޮޅަށް ކުޅުނު މެޗުން މޮޅުވެ ލީގުގެ ތާވަލުގެ ދެވަނައިގައި ހަމަޖެހިލައިފިއެވެ. މި މެޗު ނިމުނީ 2-1 އިންނެވެ.

މެޗުގެ ފުރަތަމަ ހާފުގެ ނިމުމާ ކައިރިވެފައި ވަނިކޮށް 43 ވަނަ މިނެޓުގައި މާކް ކުކުރެއްލާ ޖެހި ލަނޑުން ޗެލްސީ ކުރިއަރައިގެން ލީޑުނެގިއެވެ. އަދި މެޗުގެ 80 ވަނަ މިނެޓުގައި ނިކޮލަސް ޖެކްސަން ޖެހި ލަނޑުން ޗެލްސީގެ ލީޑު ވަނި ފުޅާކޮށްފައެވެ. ނަމަވެސް މެޗުގެ އެންމެ ފަހު މިނެޓުގައި ބްރެންޓްފޯޑްގެ ބްރަޔަން މްބޫމޯ ވަނީ ގޯލެއްޖަހައި ފަރަގު ކުޑަކޮށްފައެވެ.

މިމެޗު ނިމުމަށްފަހު ހޫނުވެގެން ދިޔައިރު، ޗެލްސީގެ ޑިފެންޑަރު މާކް ކުކުރެއްލާއަށް ވަނީ ރަތް ކާޑު ދައްކާފައެވެ.

ރޭގެ މޮޅާއެކު އެކު ޗެލްސީއަށް ވަނީ ވިދިވިދިގެން ފަސްވަނަ މެޗު ކާމިޔާބުކޮށްފައެވެ. އަދި ޗެސްލީ ވަނީ ލީގުގެ އެއްވަނައިގައި އޮތް ލިވަޕޫލާ ދެމެދު އޮތް ފަރަގު ދެ ޕޮއިންޓަށް ކުޑަކޮށްފައެވެ. މިއީ މިދިޔަ އަހަރުގެ މި ދުވަސްވަރާ އަޅާބަލާއިރު ޗެލްސީއަށް 15 ޕޮއިންޓް އިތުރު ކުރިއެރުމެކެވެ. އަދި މޭ މަހުން ފެށިގެން އެންމެ ގިނަ މެޗު (15) ކާމިޔާބުކޮށް، އެންމެ ގިނަ ލަނޑު (51) ޖަހާފައިވަނީވެސް ޗެލްސީއިންނެވެ.

ޗެލްސީގެ އާ ކޯޗު އެންޒޯ މަރެސްކާ އައްޔަންކުރިއިރު އުފެދުނު ސުވާލުތަކަށް މިހާރު ވަނީ ޖަވާބު ލިބިފައެވެ. އާސެނަލް އަދި މެންޗެސްޓަރ ސިޓީ ފަދަ ވާދަވެރި ޓީމުތަކަށް ޕޮއިންޓް ގެއްލެމުންދާއިރު، ޗެލްސީއަކީ މި ސީޒަނުގައި ލީގު ތައްޓާ ލިވަރޕޫލާއި އެންމެ ވާދަކުރާނެޓީމުކަމަށް ވަނީ ބެލެވިފައެވެ.