މިދިޔަ ބުރާސްފަތި ދުވަހު ހައުސިން މިނިސްޓްރީ ހިމެނޭހެން ތިން މިނިސްޓްރީއެއްގައިހިނގި އަލިފާނުގެ ހާދިސާއާއި ގުޅޭ މައުލޫމާތު ހޯދުމަށް ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމެޓީ)ން ނިންމައި އެމްއެންޑީއެފް އާއި ފުލުހުން ކޮމެޓީއަށް ހާޒިރުކުރަން ނިންމައިފި އެވެ.

ސަލާމަތީ ހިދުމަތްތަކާ ބެހޭ ކޮމެޓީގެ ބައްދަލުވުމެއް ބާއްވާ އެބައްދަލުވުމަށް އެމްއެންޑީއެފް އާއި ފުލުހުން ހާޒިރުކުރަން ނިންމާފައިވަނީ ކޮމެޓީގެ މުގައްރިރު އޭދަފުށީ ދާއިރާގެ މެމްބަރު އަހުމަދު ސަލީމް ގެ އެދިވަޑައިގަތުމަކަށެވެ. ކޮމެޓީ ބައްދަލުވުންތަވަލުކޮށްފައިވަނީ އަންނަ ބުރާސްފަތި ދުވަހު ހެނދުނު 10:00 އަށެވެ. އަދި އެކަން މިހާރު ވަނީ ކޮމެޓީގެ މެމްބަރުންނަށްވެސް އަންގާފަ އެވެ.

އެމްއެންޑީއެފްއާއި ފުލުހުން 241 ކޮމެޓީއަށް ހާޒިރުކުރާން ނިންމާފައިވާއިރު ހައުސިން އަދި ކޮންސްޓްރަކްޝަން މިނިސްޓްރީ ހިންގި ޓިނު ބިލްޑިންގުގައި ބުރާސްފަތިދުވަހު ހިނގި އަލިފާނުގެ ހާދިސާގައި އެތާ ކައިރީ ހުރި ގްރީން ބިލްޑިންގުގައި ރޯވެ އެނދުމުގެ ޒިންމާ އެމްއެންޑީއެފުން އުފުލަން ޖެހޭނެ ކަމަށް އެމްޑީޕީން މިއަދު ބުނެފައިވަނިކޮށެވެ. އަދި ސަލާމަތީ ހިދުމަތްތަކާ ބެހޭ ކޮމެޓީން އެކަން ހިނގިގޮތް ތަހުގީގުކުރުމަށްވެސް އެމްޑީޕީން ގޮވާލާފައިވެ އެވެ.

އަލިފަނުގެ ހާދިސާ ހިނގި ދުވަހުގެ ހަވީރު ބޭއްވި ސަލާމަތީ ހިދުމަތްތަކާ ބެހޭ ކޮމެޓީގެ ބައްދަލުވުމަށް ހޯމް މިނިސްޓަރު އަލީ އިހުސާން ހާޒިރުކޮށް އެކަމާ ގުޅޭ މައުލޫމާތު ކޮމެޓީން ވަނީ ހޯދާފަ އެވެ. އެހެން ނަމަވެސް އެކޮމެޓީ ވަނީ ސިއްރު ކޮށްފަ އެވެ.

އަލިފާނުގެ ހާދިސާ އެންމެ ފުރިހަމައަށް ތަހުގީގު ކުރާނެ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވެސް ވަނީ ވިދާޅުވެފަ އެވެ. އަދި އެ ހާދިސާ ތަހުގީގުކުރުމަށް ރާއްޖެއިން ބޭރުގެ ތަހުގީގު ޓީމެއްގެ އެހީތެރިކަން ހޯދުމަށް ނިންމާފައިވާ ކަމަށްވެސް ޝުޖާއު ވިދާޅުވި އެވެ.

މި އަލިފާނުގެ ހާދިސާގައި ތިން މިނިސްޓްރީއެއް ހިންގި އިމާރާތަށް ގެއްލުންވެފައިވާއިރު، އެ މިނިސްޓްރީތަކުގެ ޚިދުމަތްތައް ވަގުތީ ގޮތުން ވަނީ މެދުކެނޑިފައެވެ. އެހެންނަމަވެސް، އަލުން ޚިދުމަތްތައް ފެށުމަށްޓަކައި ދަރުބާރުގޭގައި ވަގުތީ އޮފީސްތައް ގާއިމުކޮށް، މިއަދު ވަނީ ހިދުމަތްދޭން ފަށާފަ އެވެ.

ބުރާސްފަތި ދުވަހުގެ ހެނދުނު 7 ޖެހިއިރު ރޯވި އަލިފާންގަނޑު، އެމްއެންޑީއެފް އަދި ގުޅުން ހުރު އިދާރާތަކުގެ މަސައްކަތުން ނިންމާލެވުނީ އެދުވަހުގެ މެންދުރު 12ގެ ފަހުންނެވެ. އެ ހާދިސާގައި ހައުސިން މިނިސްޓްރީ އަދި ކޮންސްޓްރަކްޝަން ހިމެނޭ ޓިނު އިމާރާތައި، އެންވަޔރަމެންޓް މިނިސްޓްރީ ހިމެނޭ ގްރީން ބިލްޑިންގެ އިތުރުން، މާލެ ސިޓީ ކައުންސިލު ހިންގާ ބޮލްކެއްގައި ވެސް ވަނީ ރޯވެފައެވެ.