މި މަހުގެ ހަވަނަ ދުވަހު މާލޭގެ އާޓިފިޝަލް ބީޗުގައި ހިންގި މާރާމާރީގައި އެންމެ އިސްކޮށް ހަރަކާތްތެރިވި އިންޑިޔާގެ ބިދޭސީ މީހާ ޑިޕޯޓުކުރުމުގެ މަސައްކަތް ކުރަމުންދާކަން އިމިގްރޭޝަނުން ހާމަކޮށްފިއެވެ.

އިމިގްރޭޝަނުން އިއްޔެ "އެކްސް"ގައި ކުރި ޕޯސްޓެއްގައި ބުނީ، އެ މާރާމާރީގައި އެންމެ އިސްކޮށް ހަރަކާތްތެރިވިކަމަށް ބެލެވޭ އުމުރުން 25 އަހަރުގެ އަމްރިތް ސިންހް، ފުލުހުންގެ އެހީތެރިކަމާއެކު އިމިގްރޭޝަނުގެ ބެލުމުގެ ދަށަށް ގެނެވިފައިވާ ކަމަށާއި، އޭނާ ޑީޕޯޓުކުރުމުގެ މަސައްކަތް މިހާރު ކުރަމުންދާ ކަމަށެވެ.

އެ މީހާ ޑީޕޯޓުކުރުމުގެ މަސައްކަތް އިމިގްރޭޝަނުން ކުރަނީ، އާޓިފިޝަލް ބީޗު ސަރަހައްދުގައި މާރާމާރީ ހިންގައި އާއްމު މަސްލަހަތު ނަގާލުމުގައި ބައިވެރިވެފައިވާ ބިދޭސީންގެ މައްސަލަ އިމިގްރޭޝަނުގެ ޓާސްކް ފޯސް އިން ބަލައި، އެ ކަމުގައި ޝާމިލުވާ ބިދޭސީންނަށް ފިޔަވަޅު އަޅާނެ ކަމުގެ ޔަގީންކަން ކޮންޓްރޯލާ ޖެނެރަލް އޮފް އިމިގްރޭޝަން މުޙައްމަދު ޝަމްއާން ވަހީދު ދެއްވާފައިވަނިކޮށެވެ.

އެގޮތުން މި މަހުގެ 6 ވަނަ ދުވަހު އާޓިފިޝަލް ބީޗުގައި އެ މާރާމާރީ ހިންގާފައިވަނީ އިންޑިޔާގެ ދެ ގްރޫޕެއްގެ ދެމެދުގައެވެ.