މާލޭގައި އުޅޭ ބުޅާ ހިފައިގެން އޭގެއިން ކާތަކެތި ތައްޔާރުކޮށް ވިއްކާ ކަމަށް ތުހުމަތުކުރެވޭ ބަންގްލަދޭޝް ރައްޔިތެއް މޯލްޑިވްސް އިމިގްރޭޝަނުން ހައްޔަރުކޮށްފިއެވެ.

ރޭ ހައްޔަރުކޮށްފައިވަނީ ބަންގްލަދޭޝަށް ނިސްބަތްވާ 32 އަހަރުގެ އަރްފާތް ހޮސެއިން އެވެ. އޭނާގެ މައްޗަށް ތުހުމަތުކުރެވެނީ ބުޅާ ހިފާ، އެ ކައްކާ، އޭގެއިން ބާގަރ ފަދަ ކާތަކެތި ތައްޔާރުކޮށް ވިއްކާ ކަމަށެވެ.

މި މައްސަލަ ބެލުމަށް ފުލުހުން ފަށާފައިވަނީ ބުޅާ ހިފާ އޭގެ ނަހަމަ ބޭނުންކުރާ ކަމަށް ސޯޝަލް މީޑިއާގައި މަޢުލޫމާތު ދައުރުވާން ފެށުމާ ގުޅިގެންނެވެ. އަދި މޯލްޑިވްސް އިމިގްރޭޝަނުން ވެސް ވަނީ އޭނާ ހޯދަން އިޢުލާން ކޮށްފައެވެ.

އިމިގްރޭޝަނުން އެކްސްގައި ކުރި ޕޯސްޓެއްގައި ބުނެފައިވަނީ އެ މީހާ އިމިގްރޭޝަނަށް ހާޒިރުވުމަށް އަންގައި، އިޢުލާންކޮށްފައި ވަނިކޮށް އިމިގްރޭޝަން އިންޓެލިޖެންސަށް ލިބުނު މަޢުލޫމާތާ ގުޅިގެން ފުލުހުންގެ އެހީތެރިކަމާއެކު އެ މީހާ ހޯދައި އިމިގްރޭޝަންގެ ބެލުމުގެ ދަށަށް މިހާރު ގެނެސްފައިވާ ކަމަށެވެ.

މި މައްސަލައާ ގުޅޭ އިތުރު ތަފްސީލު އަދި ހާމަކޮށްފައެއް ނުވެއެވެ. އަދި މި މައްސަލަ އިތުރަށް ތަޙުޤީޤުކުރަމުންދާ ކަމަށް ބެލެވެއެވެ.