ޝަޚްތަރުން 2023 ވަނަ އަހަރު ޗެލްސީއަށް ބޮޑު އަގުގައި ބަދަލުވި ފޯވާޑް މިހައިލޯ މުޑްރިކް މެޗުގެ ކުރިން ހެދި އެންޓި ޑޯޕިން ޓެސްޓުތަކުން ޑްރަގަށް ޕޮސިޓިވްވެ އިނގިރޭސި ފުޓްބޯޅަ އެސޯސިއޭޝަނުން އޭނާ ސަސްޕެންޑުކޮށްފިއެވެ.

ޗެލްސީއިން އެންމެ ފަހުން ކުޅުނު 5 މެޗުން މުޑްރިކް ނުފެނުނީ އަނިޔާގެ ސަބަބުންކަމަށް ޗެލްސީގެ ކޯޗު ބުނެފައިވީނަމަވެސް އިނގިރޭސި މީޑިޔާތަކުން ވަނީ އޭނާ ކުޅުމާއި ދުރުގައި ހުރީ ސަސްޕެންޝަނުގައި ހުރުމުން ކަމަށް ފަޅާއަރުވާލާފައެވެ.

އިނގިރޭސި އެފްއޭ އިން ހެދި އެންޓި ޑޯޕިން ޓެސްޓުތަކުން ދައްކާގޮތުގައި މުޑްރިކް އެފްއޭ އަށް ދީފައިވާ ސާމްޕަލްތަކުން މަނާކުރެވިފައިވާ ޑްރަގަކަށް ވަނީ ޕޮސިޓިވް ވެފައެވެ. އެހެންކަމުން މައްސަލަބަލައި ނިމެންދެން މުއްދަތެއް ނެތްގޮތަށް އޭނާވަނީ ސަސްޕެންޑުކުރެވިފައެވެ.

މިކަމާއި ގުޅިގެން މުޑްރިކް ނެރުނުބަޔާނެއްގައި ބުނެފައިވަނީ އޭނާ އެފްއޭއަށް ދިން ސާމްޕަލް ތަކުގައި މަނާކުރެވިފައިވާ ޑްރަގަށް ޕޮސިޓިވް ވެފައިވާތީ އޭނާ ހައިރާން ވާކަމަށާއި، އޭނާއަކީ ދުވަހަކުވެސް މަނާކުރެވިފައިވާ ތަކެތި ބޭނުން ކުރާމީހެއް ނޫންކަމަށެވެ. އަދި އޭނާ ކައިރީގައި އުޅޭމީހުންނަކީވެސް އެފަދަ ކަމެއް ކުރާނެ ބައެއް ނޫންކަމަށާއި، އެހެންކަމުން ތަހުގީގުތަކުން އޭނާގެ ކުށެއްނެތްކަން ސާބިތުވާނެކަމަށް އޭނާބުނެފައިވެއެވެ. އަދި މި ތުހުމަތުތަކުން ސަލާމަތްވެ ކުޅުމުގެ ތެރެއަށް އެނބުރިއައުމަށް ކެތްމަދުވެފައިވާކަންވެސް އޭނާގެ ބަޔާނުގައި ބުނެފައިވެއެވެ.