އިނގިރޭސި ޕްރީމިއަރ ލީގުގައި މިހަފްތާ ބަންދުގައި މެންޗެސްޓަރ ޔުނައިޓެޑާއި ޗެލްސީ ބައްދަލުކުރި ވާދަވެރި މެޗު އެއްވަރުވެއްޖެއެވެ. މެންޗެސްޓަރ ގެ އޯލްޓްރޮފޯޑް ގައި ކުޅެވުނު މި މެޗު ނިމުނީ 1-1 އިންނެވެ. ޔުނައިޓެޑުގެ ވަގުތީކޯޗު ވެން ނިސްޓެލްރޯއީ ގެ އިރުޝާދުގެ ދަށުން ކުޅުނު ދެ ވަނަ މެޗުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ލިބި ބޭކާރުކޮށްލާފައެވެ. އެގޮތުން ފުރަތަމަ ހާފުގައި 14 ވަނަ މިނެޓުގައި ޗެލްސީގެ މަޑޫއެކޭ ބޮލުން ގޯލަށް ފޮނުވާލި ބޯޅަ ވަނީ ދަނޑީގައި ޖެހި ބޭރުވެފައެވެ. އަދި ފުރަތަމަ ހާފު ނިމެންދަނިކޮށް މެންޗެސްޓަރ ގެ ކެޕްޓަން ބްރޫނޯއަށް ހުސްކޮށް ލިބުނު ފުރުސަތުގައި ފޮނުވާލި ބޯޅަ ގޯލު ހުރަސް ދަނޑީގައި ޖެހިފައި ބޭރުވިއެވެ.

މެޗުގެ ފުރަތަމަ ގޯލު ޖެހީ ޔުނައިޓެޑުގެ ފޯވާޑް ހޮއިލަންޑް އަށް ޗެލްސީގެ ގޯލު ކީފަރު ކުރި ފައުލަކާއި ގުޅިގެން ޔުނައިޓެޑަށް ލިބުނު ޕެނަލްޓީއަކުންނެވެ. މި ޕެނަލްޓީ ގޯލް ޖެހީ ބްރޫނޯ އެވެ. މިއީ އޭނާ މި ސީޒަންގައި ލީގުގައި ޖެހި ފުރަތަމަ ގޯލެވެ. ހަމަހަމަ ކުޅުމެއް ފެނިގެން ދިޔަ މި މެޗުގެ ޗެލްސީ އެއްވަރު ކުރި ގޯލު ޖެހީ މެޗުގެ 74 ވަނަ މިނެޓުގައި ކައިސެއިޑޯ ޕެނަލްޓީ އޭރިޔާ ބޭރުން ފޮނުވާލި ބާރު ޝޮޓެއް ގޯލަށް ވަދެގެންނެވެ. މިއީ ޕްރީމިއަރ ލީގުގައި އޭނާ މިހާތަނަށް ޖެހި ހަމައެކަނި ގޯލެވެ.

މި މެޗުން އެއްވަރުވުމުން ޔުނައިޓެޑް އޮތީ ކުޅުނު 10 މެޗުން ލިބުނު 12 ޕޮއިންޓާއެކު ލީގުގެ 13 ވަނައިގައެވެ. އަދި ޗެލްސީ އޮތީ 18 ޕޮއިންޓާއެކު ލީގުގެ 4 ވަނައިގައެވެ.