މަގާމާ ހަވާލުވީތާ ގާތްގަޑަކަށް ތިން މަސް ފަހުން، ޕަބްލިކް ސާވިސް މީޑީއާ (ޕީއެސްއެމް)ގެ މެނޭޖިން ޑިރެކްޓަރުގެ މަގާމުން މުހައްމަދު ސައީދު އިސްތިއުފާ ދެއްވައިފިއެވެ.

ޕްރައިވަޓައިޒޭޝަން އެންޑް ކޯރްޕޮރޮޓައިޒޭޝަން ބޯޑް (ޕީސީބީ) އިން މިއަދު "އެކްސް" ގައި ކުރި ޕޯސްޓްއެއްގައި ބުނީ، ޕީސބީ އަށް އިއްޔެ ސައީދުގެ ފަރާތުން އިސްތިއުފާ ހުށަހަޅުއްވާފައިވާ ކަމަށާއި، އެ އިސްތިއުފާ ގަބޫލުކޮށް މިހާރު މަގާމުން ވަކިކޮށްފައިވާ ކަމަށެވެ.

ސައީދު އެ މަގާމުން އިސްތިއުފާ ދެއްވިއިރު، ޕީއެސްއެމްގެ އެމްޑީއަކަށް ސައީދު އައްޔަނުކޮށްފައިވަނީ މިދިޔަ އޮގަސްޓު މަހުގެ ތެރޭގައެވެ. އެއީ ކުރިން އެ މަގާމުގައި ހުންނެވި ޒީނާ ޒާހިރު އެ މަގާމުން އިސްތިއުފާދެއްވުމާ ގުޅިގެންނެވެ. ޒިނާ އެ މަގާމުން އިސްތިއުފާ ދެއްވީ އެ މަގާމުގައި ގާތްގަޑަކަށް ނުވަ މަސް ހުންނެވުމަށް ފަހުއެވެ.

ކުރު މުއްދަތަކަށް ފަހު ސައީދު އިސްތިއުފާ ދެއްވި ނަމަވެސް، އިސްތިއުފާ ދެއްވި ސަބަބު ހާމަކުރައްވާފައެއް ނުވެއެވެ.

ސައީދު މަގާމުން އިސްތިއުފާ ދެއްވިއިރު، ޕީއެސްއެމްގެ ކޮންޓެންޓާ ގުޅޭ މައްސަލަތަކެއް މިފަހުން ފެންމަތިވެފައި ވެއެވެ. އެގޮތުން ޕީއެސްއެމުން ވަގުތުން ގެނެސްދިން އިވެންޓެއްގައި ޤުރުއާނުން ބައެއް އުނިވީ ކަމަށް ބުނެ މިދިޔަ ބުރާސްފަތި ދުވަހު ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހަޅައިފައިވެއެވެ. އެކަމާ ގުޅިގެން ޕަބްލިކްގައި ސައީދު ހިމެނިވަޑައިގަންނަވާ ގޮތަށް، ޕީއެސްއެމްގެ މެނޭޖްމެންޓުން ވަނީ މައާފަށް ވެސް އެދިފައެވެ.

މީގެއިތުރުން ޕީއެސްއެމްއިން ގެނެސްދިން އިނގިރޭސި ޚަބަރުގެ ސެގްމަންޓެއްގައި ބޭއަދަބީ މަންޒަރެއް ދެއްކި މައްސަލައެއް ފެންމަތިވެ، އެކަމާ ގުޅިގެން ދެ މުވައްޒަފަކު ވެސް ވަނީ ސަސްޕެންޑުކޮށްފައެވެ.