މާލޭގެ ހަވީރީ ހިނގުމުގައި ހުންނަ، ލެޓް ކޮފީ މޯލްޑިވްސްގެ ކެފޭއަށް ވަދެ، ހަމާލާދިން މައްސަލައިގައި ދެ މީހަކު ހައްޔަރުކޮށްފިއެވެ.

ފުލުހުން ބުނީ، މިދިޔަ ބުރާސްފަތި ދުވަހުގެ މެންދުރު އެ ކެފޭއަށް ވަދެ، ތޫނު ހަތިޔާރު ބޭނުންކޮށްގެން އެތަނުގެ މުވައްޒަފުންނަށް ބިރުދައްކައި މުދަލަށް ގެއްލުންދީފައިވާ މައްސަލައާ ގުޅިގެން، މިދިޔަ ހޯމަ ދުވަހަކު ދެ މީހަކު ފުލުހުންގެ ބެލުމުގެ ދަށަށް ގެނެސް ބަންދު ޖަހާފައިވާ ކަމަށެވެ.

އެގޮތުން ހައްޔަރުކޮށްފައިވަނީ، ގއ. ދެއްވަދޫ، ވައިލެޓްމާގެ، އުމުރުން 31 އަހަރުގެ އަހްމަދު ތައުފީގު އާއި، ބ. ތުޅާދޫ، މީޒާނުގެ އުމުރުން 44 އަހަރުގެ އައްސަދުﷲ ހާތިމްއެވެ. އެ ދެމީހުންގެ ބަންދާމެދު ގޮތެއް ނިންމުމަށްޓަކައި ކްރިމިނަލް ކޯޓަށް ހާޒިރުކުރުމުން، ފަސް ދުވަހަށް ބަންދުގައި ބޭތިއްބުމަށް އަމުރުކޮށްފައިވާ ކަމަށެވެ.

އެ މައްސަލަ ފުލުހުން ގެންދަނީ ތަހުގީގު ކުރިމުންނެވެ.

އެނގިފައިވާ ގޮތުގައި، އެ ދެމީހުން އެ ކެފޭއަށް ވަނީ، އެ ކެފޭގައި "ކްރިސްމަސް" ފާހަގަކުރާ ކަމުގައި ބުނެއެވެ. އެހެން ނަމަވެސް އެ ކެފޭގެ ވެރިފަރާތުން ވަނީ، އެފަދަ ކަމެއް އެ ކެފޭގައި ނުކުރާ ކަމުގައި ބުނެ، އެ ތުހަމުތައް ދޮގުކޮށްފައެވެ.