މެންޗެސްޓަރ ޔުނައިޓެޑްގެ އިނގިރޭސި ސްޓްރައިކަރު މާކަސް ރަޝްފޯޑް ކްލަބް ދޫކޮށްލުމަށް ތައްޔާރުވެފައިވާކަމަށް ބުނެފިއެވެ. މިދިޔަ އާދީއްތަ ދުވަހު ޔުނައިޓެޑުން މެންޗެސްޓަރ ސިޓީ ބަލިކުރި މެޗުގައި ރަޝްފޯޑް ޓީމު ލިސްޓުން ބާކީކުރިއިރު، އޭނާއާއި އަލެޚަންދްރޯ ގަރނާޗޯ ސިޓީމެޗުގައި ސްކޮޑުގައި ނުހިމެނުނު އެކުޅުންތެރިން ގެ ފެންވަރު ޓްރެއިނިންގ ގެ ތެރެއިންނާއި ކުޅުމުން ބޭރުގައި ނުދެއްކުމުންކަމަށް މެނޭޖަރު ރޫބެން އަމޮރިމް ބުނެފައިވެއެވެ.

މިކަމާ ގުޅިގެން މީޑިއާތަކުން ވަނީ ޔުނައިޓެޑުން ރަޝްފޯޑް ވިއްކާލަން އުޅޭ ކަމަށް ރިޕޯޓުކޮށްފައެވެ. އުމުރުން 7 އަހަރުން ފެށިގެން ޔުނައިޓެޑްގައި ކުޅެމުން އަންނަ 27 އަހަރުގެ ރަޝްފޯޑް މިކަމާ ގުޅޭ ގޮތުން ވާހަކަދައްކާފައިވަނީ ކްރިސްމަސް ހަދިޔާ ދިނުމަށް އޭނާގެ ކުރީގެ ސްކޫލަށް ޒިޔާރަތްކުރި ދަތުރެއްގައެވެ.

"އަހަރެންނަށް ހީވަނީ އައު ގޮންޖެހުމަކަށް އަހަރެން ތައްޔާރުވެއްޖެ ކަމަށް. ދެން އޮތީ ކުރިއަށް ދިއުން،" އަންގާރަ ދުވަހުގެ ރޭ ފުޓްބޯޅަ ލިޔުންތެރިޔާ ހެންރީ ވިންޓަރ ކުރި ސުވާލުގައި ރަޝްފޯޑް ބުނެފައިވެއެވެ.

"އަހަރެން ދާއިރު އެއްވެސް ނުރުހުމެއް ނޯންނާނެ. މެންޗެސްޓަރ ޔުނައިޓެޑާ ބެހޭ ގޮތުން އެއްވެސް ނޭދެވޭ އެއްޗެއް އަހަރެންގެ ފަރާތުން ނާންނާނެ. އެއީ އަހަރެންގެ ޒާތް. ކަމެއް ގޯސްވެފައި އޮތް ކަމަށް ވަންޏާ އެކަން އިތުރަށް ގޯސްކުރާކަށް އަހަރެން ނޫޅޭނަން. ކުރިން އެހެން ކުޅުންތެރިން ދިޔަ ގޮތް އަހަރެން ދެކެފައިވާނެ. އަހަރެން ބޭނުމެއް ނޫން އެކަހަލަ މީހަކަށް ވާކަށް. އަހަރެން ދާއިރު ބަޔާނެއް ނެރޭނަން. އެއީ އަހަރެންގެ ފަރާތުން،" ރަޝްފޯޑް ބުންޏެވެ.