އިނގިރޭސި ޕްރީމިއަރ ލީގު ރައުންޑު 9 އެއްގައި މެންޗެސްޓަރ ޔުނައިޓެޑް ރޭ ކުޅުނު މެޗުން އަނެއްކާވެސް ބަލިވެއްޖެއެވެ. ލަންޑަން ސްޓޭޑިއަމްގައި ކުޅުނު މި މެޗުގައި ބަލިވުމާއެކު، މެންޗެސްޓަރ ޔުނައިޓެޑުން އެންމެ ފަހުން ކުޅުނު 8 މެޗުގެ ތެރެއިން މޮޅުވެފައިވަނީ އެންމެ މެޗަކުންނެވެ.

މެޗު ފަށައިގެން ޔުނައިޓެޑުން ރަނގަޅުކުޅުމެއް ކުޅެމުން އައި ނަމަވެސް ފުރަތަމަ ހާފު ނިމުނީ އެއްވެސް ޓީމަކަށް ގޯލު ނުޖެހި އެއްވަރުވެގެންނެވެ. މެޗުގެ ފުރަތަމަ ގޯލްޖެހީ މެޗުގެ 74 ވަނަ މިނެޓުގައި ވެސްޓްހޭމްގެ އެޓޭކަރ ހޮލެންޑުގެ ކްރިސެންސިއޯ ސަމަވިލްއެވެ. އެހެން ނަމަވެސް ޔުނައިޓެޑުގެ ތަޖުރިބާކާރު މިޑްފީލްޑަރ ކެސެމީރޯ ވަނީ މެޗުގެ 81 މިނެޓުގައި ގޯލު ޖަހާ ނަތީޖާ ހަމަހަމަ ކޮށްދީފައެވެ. މި މެޗުގައި ވެސްޓްހޭމް މޮޅުވި ގޯލް އެޓީމަށް ކާމިޔާބުކޮށްދިނީ މެޗުގެ އިތުރުވަގުތުގައި ލިބުނު ޕެނަލްޓީއަކުން އިންގްލޭންޑް ގެ ޖޭރެޑް ބޮވެންއެވެ.

މި ބައްޔާއެކު ޔުނައިޓެޑުން ވަނީ ކުޅުނު ނުވަމެޗުން ލިބުނު 11 ޕޮއިންޓާއެކު ލީގު ތާވަލުގެ 14 ވަނަ އަށް ވެއްޓިފައެވެ. ލީގުގައި މިހާތަނަށް މެންޗެސްޓަރ ޔުނައިޓެޑުން މޮޅުވެފައިވަނީ އެންމެ ތިން މެޗުންނެވެ. އެހެންކަމުން މިއީ މިހާތަނަށް ޔުނައިޓެޑުން ވަނީ ސީޒަނެއްގައި އެޓީމު ލީގުގައި އެންމެ ދަށްކޮށް ފެށި ސީޒަނަށް ވެގެންވަނީ ގޮސްފައެވެ. މި ސީޒަނުގައި ޔުނައިޓެޑުން ދައްކަމުން ގެންދާ ދަށް ނަތީޖާތަކުގެ ސަބަބުން ކޯޗުކަމުން ވަކިކުރުމުގެ ބިރު ހީވެފައިވާ ޓެން ހާގް އަށް ވަނީ މި ބައްޔާއެކު އިތުރު ޕްރެޝަރާ ކުރިމަތިލާން ޖެހިފައެވެ.

ލީގުގައި މިރޭކުޅުނު އެހެން މެޗުތަކަށް ބަލާއިރު މި ސީޒަންގައި މޮޅުކުޅުމެއް ދައްކަމުން އަންނަ ޗެލްސީއިން ވަނީ ނިއުކާސަލް އަތުން 2-1 ން މޮޅުވެފައެވެ. އަދި ޓޮޓްނަމް ވަނީ ކްރިސްޓަލް ޕެލަސް އަތުން 1-0 އިން ބަލިވެފައެވެ.