ފުލުހުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އަށް ވަދެފައިވަނީ ސާވާގައި ހުރި ޑޮކިއުމަންޓްތަކެއް ނައްތާލާކަމަށް ލިބުނު މައުލޫމާތެއްގެ ތަހުގީގަށްކަން މެންދުރު ޓީވީއަށް އެނގިއްޖެއެވެ.

މެންދުރު ޓީވީއަށް މައުލޫމާތުދެމުން އެޗްޑީސީގެ ބޯޑު މެމްބަރަކު ވިދާޅުވީ އެޗްޑީސީގެ އިމާރާތުގަިއ ފުލުހުން ހަރަކާތްތެރިވަނީ އައިޓީ ޑިޕާޓްމަންޓުން ސާވާގައި ހުރި ޑޮކިއުމެންޓްތަކެއް ނައްތާލާކަމުގެ މައުލޫމާތު ފުލުހުންނަށް ލިބުމާ ގުޅިގެން އެކަން ތަހުގީގުކުރުމަށްކަމަށެވެ.

އަދި ވަކި އެއްޗެއް ބުނަން އެނގޭނީ ފުލުހުންގެ ތަހުގީގު ނިމުމުންކަމަށް އޭނާ ވިދާޅުވިއެވެ.

މެންދުރު ޓީވީއަށް މައުލޫމާތު ދެއްވަމުން މީގެ ކުރިން ފުލުހުންގެ މީޑިއާ އޮފިޝަލް ވިދާޅުވެފައިވަނީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދީފައިވާކަމަށް ބެލެވޭ މައްސަލައެއް ފެންމަތިވުމާ ގުޅިގެން އެ މައްސަލައިގެ ޖިނާއީ ތަހުގީގެއް ފުލުހުން ކުރަމުން އަންނަ ކަމަށެވެ.

ހުޅުމާލޭގައި މިވަގުތު ބިން ދޫކުރަނީ ފޭސް 2 އިން ހިއްކާފައިވާ ސަރަޙައްދުންނެވެ. އަދި ފޭސް 3 ގެ ގޮތުގައި ހިއްކަމުންދާ ބިމުންވެސް، އެ މަސައްކަތް ނިމުން ގޯތި ދޫކުރާނެއެވެ.

މިހުރިހާ ގޯތިތަކަކީ ވެސް ޕީޕީއެމްގެ ފުރަތަމަ ސަރުކާރުން ހިއްކާ ނިންމާފައިވާ ތަންތަނެވެ. އަދި މިހާރު ފޭސް ތިނެއް ހިއްކުމުގެ މަސައްކަތް ސަރުކާރުންދަނީ ކުރަމުންނެވެ.

އެޗްޑީސީއަކީ އިންތިހާބުތަކާ ދިމާކޮށް އެމްޑީޕީގެ ސަރުކާރުގައި ގިނަ އަދަދަކަށް ވަޒީފާދީފައިވާ މުވައްޒަފުން ގިނަ އަދަދަކަށް ތިބިިތަނެއްކަން އެނގިފައިވެއެވެ. މިއިން އެއްވެސް މުވައްޒަފަކު މި ސަރުކާރުން ވަކިކޮށްފައެއްނުވެއެވެ.