ރާއްޖޭގެ ފުޓްބޯޅަ ސީޒަން ފެބުރުވަރީ މަހުގެ 14 ވަނަ ދުވަހުގައި ފަށާގޮތައް ހަމަޖެހިއްޖެއެވެ. މީގެ ކުރިން އެފް.އޭ.އެމް އިން ރާވާފައި އޮތީ އަންނަ އަހަރުގެ ފުޓްބޯޅަ ސީޒަން ޖަނަވަރީމަހު ފަހުކޮޅުގައި ފަށާށެވެ. ނަމަވެސް އެކި ސަބަބުތަކާހުރެ މިތާރީޚައް ސީޒަން ނުފެށޭނެކަން އެފް.އޭ.އެމް އިން މިހާރު ވަނީ ކުލަބުތަކަށް އަންގާފައެވެ.

އެފް.އޭ.އެމް އިން ކުލަބުތަކަށް ފޮނުވި ކަލަންޑަރުގައިވާގޮތުން މި އަހަރުގައި މައިގަނޑު 6 މުބާރާތެއް އެފް.އޭ.އެމް އިން ވަނީ ރާވާފައެވެ. އެއީ ސީޒަން ހުޅުވާ މެޗު ފެބްރުވަރީ 14 ގައި ކުޅުމަށާއި ފެބްރުއަރީ 17 ގައި ރައީސް ގެ ވާދައިގެ ތައްޓަށް ކުޅެވޭ ޕްރެސިޑެންޓަލް ކަޕް ކުޅުމަށާއި ދިވެހި ލީގު އޭޕްރީލް 8 ގައި ފެށުމަށާއި ތިންވަނަ ޑިވިޝަނުގެ ފުޓްބޯޅަ މުބާރާތް މެއިމަހުގެ 31 ގައި ފެށުމަށާއި އެފް.އޭ ކަޕް ޖުލައި 12 ގައި އަދި ދެވަނަ ޑިވިޝަނުގެ ފުޓްބޯޅަ މުބާރާތް ޖުލައި 18 ގައި ފެށުމަށެވެ.

މިހާރު ދިވެހި ފުޓްބޯޅަ ސީޒަން ހުއްޓިފައި އޮންނަތާ އަހަރެއްވެއްޖެއެވެ. މިއީ ތާރީޚުގަވެސް ފުޓްބޯޅަ މެދުކެނޑިފައި އޮންނަތާ އެންމެ ދިގު މުއްދަތެވެ. މިކަމުގެ ސަބަބުން ފުޓްބޯޅަ ކުލަބުތަކުގެ ހަރަކާތްތައް ވަނީ ހުއްޓުމަކަށް އައިސްފައެވެ. އަދި މިއާއެކު ކުލަބުތަކުން ކުޅުންތެރިންނަށް މުސާރަނުދެވި، ކުލަބުތަކުގެ ޕްރެކްޓިސްތައް ވަނީ ހުއްޓާލާފައެވެ. އަދި ފުޓްބޯޅަ ސީޒަން ފަށާނެ ތާރީޚެއް ޔަޤީން ނުވާތީ، އައު ސީޒަނަށް ޕްރެކްޓިސް ފެށި ހަމައެކަނި ކުލަބު ކަމަށްވާ މާޒިޔާ ސްޕޯޓްސް އެންޑް ރެކްރިއޭޝަން ކުލަބުންވަނީ މިދިޔަ ހަފްތާގައި ޕްރެކްޓިސްތައް މެދުކަނޑާލާފައެވެ.