ޕްރީމިއަރ ލީގުންކުރާ 115 ދަޢުވާގައި ހުކުމް ކުރުމާއި ގާތުގައި އޮތް މެންޗެސްޓަރ ސިޓީ އަނެއްކާވެސް ބަލިވެއްޖެއެވެ. ރޭގައި އެސްޓަންވިލާ އާއި ދެކޮޅަށް ކުޅުނުމެޗުން ސިޓީ ބަލިވީ 2-1 އިންނެވެ.

މެޗުގެ ފެށިގެން 16 ވަނަ މިނެޓުގައި އެސްޓަންވިލާއިން ވަނީ ލީޑު ނަގާފައެވެ. ފުރަތަމަ ހާފުގައި ސިޓީއިން ޑޮމިނޭޓުކޮށް ކުޅެނިކޮށް އެސްޓަންވިލާގެ ޔޫރީ ޓިލަމަންސް ދިން ބޯޅައަކުން މިގޯލު ކާމިޔާބުކޮށްދިނީ ޖޯން ޑޫރާން އެވެ. މި ގޯލުގެ ފަހުންވެސް ފުރަތަމަ ހާފުގައި ސިޓީއިން ވަނީ މެޗު ކޮންޓްރޯލްކޮށް ގޯލުޖަހަން މަސައްކަތް ކޮށްފައެވެ.

ނަމަވެސް ދެވަނަ ހާފުގައި ސިޓީއިން ދެއްކީ އާދަޔާ ޚިލާފު ދަށްކުޅުމެކެވެ. ފަހަކަށް އައިސް ސިޓީގެ ފަރާތުން ފެނުނު ދަށްކުޅުން ތަކުރާރުވި ދެވަނަ ހާފުގެ 65 ވަނަ މިނެޓުގައި އެސްޓަންވިލާގެ ރޯޖަރސް ވަނީ އިތުރު ގޯލެއްޖަހައި ލީޑު ފުޅާކޮށްފައެވެ.

މެންސިޓީގެ ހަމައެކަނި ގޯލަކީ މެޗުގެ އިތުރުވަގުތުގެ ފަހުވަގުތުގައި މިދިޔަ ސީޒަންގެ ޕްރީމިއަރ ލީގުގެ މޮޅުކުޅުންތެރިޔާ ފިލް ފޯޑެން ޖެހިގޯލެކެވެ. މިއީ މި ސީޒަނުގައި ލީގުގައި އޭނާޖެހި ފުރަތަމަ ގޯލެވެ.

ރޭގެ ބައްޔާއެކު ސިޓީ އެންމެ ފަހުން ކުޅުނު 12 މެޗުން މޮޅުވީ އެންމެ މެޗަކުންނެވެ. އަދި ދެމެޗުން އެއްވަރުވެފައިވާއިރު، 9 މެޗުން ވަނީ ބަލިވެފައެވެ.