ސްޕެނިޝް ލަލީގާގައި ރޭގައި ބާސެލޯނާ އާއި އެތްލެޓިކޯ ބައްދަލުކުރި މެޗުގައި ފަހު ސިކުންތުކޮޅުގައި ގޯލެއްޖަހައި އެތްލެޓިކޯ މޮޅުވެއްޖެއެވެ. ބާސެލޯނާގެ އަމިއްލަ ދަނޑުގައި ކުޅެވުނު މިމެޗުން ބާސެލޯނާ ބަލިވީ 1-2 އިންނެވެ.

މެޗުގެ ފުރިހަމަ ކޮންޓްރޯލް އޮވެގެން ކުޅުނު މިމެޗުގައި ބާސެލޯނާގެ ފުރަތަމަ ގޯލުޖަހައިދިނީ މެޗުގެ މޮޅުކުޅުމެއް ދެއްކި މިޑްފީލްޑަރ ޕެޑްރީއެވެ. މެޗުގެ 29 ވަނަ މިނެޓުގައި ޕެޑްރީ ތިން މީހުން އަތުން ކަޓުވާލުމަށްފަހު ގަވީއަށް ދިންބޯޅަ ވީނުވީ ނޭނގިގެން އުޅެނިކޮށް ޕެޑްރީއަށް ތަނަވަސްވި ފުރުސަތުގައި ގޯލުގެ ކަނަށް ޖަހައި ބާސެލޯނާއިން ވަނީ ލީޑުނަގާފައެވެ. މީގެ އިތުރުންވެސް ބާސެލޯނާއަށް ވަނީ ގޯލުޖަހާނެ ގިނަ ފުރުސަތުތަކެއް ލިބި ބޭކާރުވެފައެވެ.

އެގޮތުން މެޗުގެ 47 ވަނަ މިނެޓުގައި ފަރމިން ލޮޕޭޒް އަށް ލިބުނު ހުސްފުރުސަތުގައި ޖެހީ ކީޕަރުގެ ފަޔަށެވެ. އަދި 56 ވަނަ މިނެޓުގައި ރަފީނިޔާ އަށް ލިބުނު ހުސްފުރުސަތުގައި ގޯލަށް އޮއްސައިލި ބޯޅަ މަތީ ދަނޑީގައި ޖެހިފައި ނިކުތީ ބޭރަށެވެ. މެޗުގެ އެންމެ ފާހަގަ ކޮށްލެވޭ ފުރުސަތަކީ 75 ވަނަ މިނެޓުގައި ގޯލުކުރިމަތިން ލެވަންޑޮވްސްކީ ހުސްކޮށް ލިބި، ހުސްފައި ހޫރުވާލި ފުރުސަތެވެ. މީގެ އިތުރުންވެސް މިމެޗުގައި ގޯލުޖަހާނެ ހުސް ފުރުސަތުތަކެއް ބާސެލޯނާއަށް ވަނީ ލިބިފައެވެ.

މިމެޗުގެ އެތްލެޓިކޯގެ ފުރަތަމަ ގޯލަކީ 59 ވަނަ މިނެޓުގައި ބާސެލޯނާގެ މިޑްފީލްޑަރ ކަސަޑޯ ދިން ބޯޅައަކުން އާރޖެންޓީނާގެ ރޮޑްރިގޯ ޑިޕޯލް ޖެހި ގޯލެކެވެ. މެޗުގެ ފަހުގޯލު ޖަހައިދިނީ މެޗުގެ ފަހު ސިކުންތުގައި އާރޖެންޓީނާގެ މޮލީނާ ހުސްކޮށް ނަގައިދިން ހުރަހަކުން ސޮރލޯތް އެވެ.

ރޭގެ ބައްޔާއެކު ސީޒަނުގެ ކުރީކޮޅުގައި 9 ޕޮއިންޓުގެ ފަރަގަކާއެކު އެއްވަނައިގައި އޮތް ބާސެލޯނާވަނީ އެއްމެޗު އިތުރަށްކުޅެ 3 ޕޮއިންޓުގެ ފަރަގަކާއެކު ތާވަލުގެ ދެވަނައިގައެވެ. އެގޮތުން ބާސެލޯނާ އެންމެ ފަހުން ލީގުގައި ކުޅުނު 7 މެޗުން މޮޅުވީ އެންމެ މެޗަކުންނެވެ.

މިއީ ބާސެލޯނާއިން ކަމުނުގޮސްގެން ބޭރުކުރި ޒަވީ ހެނާންޑޭސް ބޭރުކުރި ސީޒަނުގައި، ޒަވީ ހޯދި ނަތީޖާއަށްވުރެ ދަށްނަތީޖާ ތަކެކެވެ. ބާސެލޯނާގެ ކޯޗުކަމާ ޒަވީ ހަވާލުވިފަހުން ކުޅުނު ފުރަތަމަ ފުލް ސީޒަނުގައި އޭނާ ވަނީ ލީގު ތަށި ނަގައިދީފައެވެ. އަދި ނިމިދިޔަ ސީޒަނުގައި ދެބައިވިއިރު ބާސެލޯނާ ވަނީ 41 ޕޮއިންޓް ހޯދާފައެވެ. މި ސީޒަނުގައި ފްލިކް އަށް ހޯދުނީ 38 ޕޮއިންޓެވެ.