ފުލުހުންނާއި އެންޓިކޮރަޕްޝަން ކޮމިޝަން އޭސީސީ އިން ކުރިއަށްގެންދާ ގެދޮރުވެރިޔާ އަދި ބިންވެރިޔާ ސްކީމާ ގުޅޭ މައްސަލައިގެ ޖިނާއީ ތަހުގީގަށް މަގުފަހި ކުރުމަށްޓަކައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ 15 މުވައްޒަފަކު މިއަދު ވަކިކޮށްފި އެވެ.

ބިންވެރިޔާ ސްކީމްގެ ދަށުން ގޯތި ލިބޭ މީހުންގެ ލިސްޓުގައި ނުހިމެނޭ ފަރާތްތަކަކަށް ގޯތި ދިންކަމަށް ތުހުމަތުކުރެވޭ މައްސަލައިގައި ޕްރޮސެކިއުޓަ ޖެނެރަލް އައްބާސް ޝަރީފްގެ އަމުރަކަށް ފުލުހުން ވަނީ ޖިނާއީ ތަހުގީގެއް ފަށާފަ އެވެ. ތަހުގީގަށް ޖާގަ ދިނުމުގެ ގޮތުން އެޗްޑީސީން ވަކި ކުރި މުވައްޒިފުންގެ ތެރޭގައި ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން ވެސް ހިމެނެ އެވެ.

އެޗްޑީސީގެ 15 މުވައްޒިފުން ވަކިކުރި އިރު މި މައްސަލައާ ގުޅިގެން ތަހުގީގު ނިމި އެ ބޯޑުން ވަކި ގޮތެއް އަންގަންދެން އެ ކުންފުނީގެ ޗެއާމަން އަހްމަދު ނާސިފު ފިޔަވާ އެޗްޑީސީގެ ޑިރެކްޓަރުންގެ ބޯޑުގެ ހުރިހާ މެންބަރުން ވަނީ ސަސްޕެންޑްކޮށްފައެވެ. ޑިރެކްޓަރުންގެ ބޯޑު ސަސްޕެންޑް ކޮށްފައިވަނިކޮށް ކުންފުނީގެ މެނޭޖިސްގް ޑިރެކްޓަރ އިބްރާހީމް ފަޒުލް ރަޝީދު އިއްޔެ ވަނީ މަގާމުން އިސްތިއުފާ ދެއްވާފަ އެވެ.

ބިންވެރިޔާ ސްކީމްގެ ދަށުން ގޯތި ލިބޭ މީހުންގެ ލިސްޓުގައި ނުހިމެނޭ ފަރާތްތަކަކަށް ގޯތި ދިންކަމަށް ތުހުމަތުކުރެވޭ މައްސަލައިގައި ފަޒުލް ހިމެނޭހެން 20 މީހެއްގެ ޕާސްޕޯޓު ވަނީ ހިފަހައްޓާފަ އެވެ.

މިމައްސަލާގައި ދެން ތުހުމަތު ކުރެވެނީ ފަޒުލްގެ ބޭބެ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު ފަޒީލް ރަޝީދަށެވެ. އޭނާވެސް މިހާރު ވަނީ މަގާމުން ސަސްޕެންޑް ކޮށްފަ އެވެ.

އެގޮތުން "ބިންވެރިޔާ ސްކީމް"އާ ގުޅޭ ހުރިހާ މުއާމަލާތްތަކާއި ބިމާއި ކޮމާޝަލް އަދި ރެސިޑެންސް ޔުނިޓްތައް ދޫކުރުމުގެ އެއްވެސް މުއާމަލާތެއް ނުކުރުމަށާއި އިމަޖެންސީ ހާލަތެއްގައި މެނުވީ އެއްވެސް ޕްރޮކިއުމެންޓް މުއާމަލާތެއް ނުހިންގުމަށާއި ފައިސާ ދެއްކުމުގެ އެއްވެސް މުއާމަލާތެއް ނުކުރުމުގެ އިތުރުން އަލަށް މުވައްޒަފުން ނެގުމާއި ކުންފުނިން މުވައްޒަފުން ވަކިކުރުންވެސް ވަނީ ހުއްޓާލުމަށް އަންގާފައެވެ.

އެޗްޑީސީގެ ތެރެއިން ކޮރަޕްޝަންގެ މައްސަލަތަކެއް ފެންމަތިވުމާ އެކު، އެ ކުންފުނީގެ އާ މެނޭޖިން ޑިރެކްޓަކަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް މިއަދު ވަނީ އައްޔަންކޮށްފަ އެވެ.