މެންޗެސްޓަރ ޔުނައިޓެޑްގެ މަޝްހޫރު އޯލްޑް ޓްރެފޯޑް ސްޓޭޑިއަމްގައި މީދާގެ އުނދަގޫ ބޮޑުވެ، ސްޓޭޑިއަމްގެ ސާފުތާހިރުކަމުގެ ދަރަޖަ 4 އިން 2 އަށް ދަށްވެއްޖެއެވެ. މިކަން ހާމަވެފައިވަނީ ސްޓޭޑިއަމްގެ ވީ.އައި.ޕީ ލައުންޖަކުންނާއި ކާބޯތަކެތި ވިއްކާ ކިއޮސްކަކުން މީދަލުގެ ނަޖިސް ފެނުމާ ގުޅިގެންނެވެ.

މިއީ ފާއިތުވި ދުވަސްތަކެއްގެ ތެރޭގައި އޯލްޑް ޓްރެފޯޑްގައި ދިމާވެފައިވާ ދެވަނަ މިފަދަ ހާދިސާއެވެ. މީގެ ކުރިން ޔޫރަޕާ ލީގުގެ މެޗެއްގައި ގޮނޑިއެއްގެ ދަށުން މަރުވެފައިވާ މީދަލެއް ފެނިފައިވެއެވެ. މިކަމުގެ މައިގަނޑު ސަބަބަކީ ސްޓޭޑިއަމް ހުރި ސަރަޙައްދުގައި ކެނާލަކާއި ރެއިލްވޭ ލައިނެއް އޮތުމުންކަމަށް އެފަރާތުން ބުނެފައިވެއެވެ.

މި މައްސަލަ ހައްލުކުރުމަށް މެންޗެސްޓަރ ޔުނައިޓެޑުން ވަނީ ޕެސްޓް ކޮންޓްރޯލް ޚިދުމަތް ހޯދާފައެވެ. މިހާރު ހަފްތާއަކު 5 ފަހަރު ޕެސްޓް ކޮންޓްރޯލް ފަރާތްތައް ސްޓޭޑިއަމަށް ޒިޔާރަތްކުރެއެވެ. އަދި ކްލަބުން ވަނީ މި މައްސަލަ ހައްލުކުރުމަށް ސަރުކާރުގެ ކަމާބެހޭ އިދާރާތަކާއެކުވެސް މަސައްކަތް ވަނީފަށާފައެވެ.

ވިދިވިދިގެން ދެ މެޗުން މެންޗެސްޓަރ ޔުނައިޓެޑް ބަލިވެފައިވާ މިދަނޑިވަޅުގައި، ކުރިއަށް އޮތް ޑިސެމްބަރު 26 ވަނަ ދުވަހު ވޯލްވްސްއާ ކުޅޭ މެޗުން މި ހީނަރު ނަތީޖާއަށް ނިމުމެއް ގެނައުމަށް ކްލަބުން އުންމީދުކުރެއެވެ.