ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ގެއްލުނު ލެޕްޓޮޕްތައް ހޯދައިފި އެވެ.

އެޗްޑީސީގެ ފަރުކޮޅުފުށި އޮފީސް ފަޅާލައި ލެޕްޓޮޕްތަކެއް ގެންދިޔަ ވާހަކަތަކެއް ފެންމަތިވުމާ ގުޅިގެން ނޫސްވެރިން ސުވާލު ކުރުމުން ފުލުހުންގެ މީޑިއާ އޮފިޝަލް ރޭ ވިދާޅުވީ، ފަސް ލެޕްޓޮޕެއް ގެއްލުނު ކަމުގެ ރިޕޯޓެއް ފުލުހުންނަށް އިއްޔެ ލިބުނު ކަމަށެވެ.

ލެޕްޓޮޕް ވަގަށް ނެގި ކަމަށް ތުހުމަތު ކުރެވޭ މީހާ ހުރީ މަސްތުވާތަކެއްޗާ ގުޅޭ މައްސަލައެއްގައި ހައްޔަރުގައި ކަމަށާއި ތަހުގީގަށް އޭނާ އެއްބާރުލުން ދެމުންދާ ކަމަށް ފުލުހުން މީގެކުރިން ވަނީ ބުނެފަ އެވެ.

އެކަމަކު، ލެޕްޓޮޕް ފެނުނީ ކޮން ތާކުން ކަމެއް އަދި ހޯދި ގޮތެއް ނުބުނެ އެވެ.

އެޗްޑީސީގެ އިސް އޮފިޝަލަކު ކުރިން ވިދާޅުވިގޮތުގައި ވައްކަން ކުރި މީހާ ހޯދީ ސީސީޓީވީ ފުޓޭޖުގެ އެހީގަ އެވެ.

އެޗްޑީސީގެ ލެޕްޓޮޕްތަކެއް ވަގަށް ނަގަފައި މިވަނީ، ގަވާއިދާ ހިލާފަށް އެޗްޑީސީން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް ފުލުހުން ކުރަމުން ދަނިކޮށެވެ. އެގޮތުން ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލައެވެ.

މި މައްސަލަ ތަހުގީގުކުރަމުންދާއިރު، އެޗްޑީސީގެ ޗެއާމަން އަހުމަދު ނާސިފް ފިޔަވައި، އެޗްޑީސީގެ ޑިރެކްޓަރުންގެ ބޯޑުގެ ހުރިހާ މެމްބަރުން މިދިޔަ ބުރާސްފަތި ދުވަހުން ފެށިގެން ތިއްބެވީ ސަސްޕެންޝަނުގައެވެ. އަދި އެ ހުރިހާ ފަރާތްތަކެއްގެ ޕާސްޕޯޓު ވެސް ވަނީ ހިފަހައްޓާފައެވެ. އެ މައްސަލައިގެ ތެރެއިން އެޗްޑީސީގެ މެނޭޖިން ޑިރެކްޓަރު ކަމުން އިބްރާހިމް ފަޒުލް އިސްތިއުފާ ދެއްވާފައިވާއިރު، އެ ކުންފުނީގެ އައު އެމްޑީގެ ގޮތުގައި މައުރޫފް ޖަމީލް ވަނީ އައްޔަނުކޮށްފައެވެ.