ރާއްޖެއާއި ޗައިނާ ދެމެދު ވެވުނު ފްރީޓްރޭޑް އެއްބަސްވުމުގެ ދަށުން، ޗައިނާއިން ރާއްޖެއަށް އެތެރެކުރާ ފަރުނީޗަރުގެ ބާވަތްތަކުން ޑިއުޓީ މާފުކުރެވިގެންދާނެ ކަމަށް އިކޮނޮމިކް މިނިސްޓްރީން ހާމަކޮށްފިއެވެ.

ރާއްޖެއާއި ޗައިނާ ދެމެދު ވެވުނު ފްރީޓްރޭޑް އެއްބަސްވުމުގެ ސަބަބުން ލިބޭނެ ފަސޭހަތަކާއިގުޅޭގޮތުން ރައްޔިތުން ހޭލުންތެރިކުރުމުގެ ގޮތުން ކުރަމުންދާ މަސައްކަތުގެ ތެރެއިން މިނިސްޓްރީން ދެއްވި މަޢުލޫމާތުގައިވާ ގޮތުން، މިހާރު ޗައިނާއިން ރާއްޖެއަށް އެތެރެކުރާ ފަރުނީޗަރުގެ ބާވަތްތަކުން 5 އިންސައްތައިގެ ޑިއުޓީއެއް ނަގަމުން ދިޔަނަމަވެސް ފްރީޓްރޭޑް އެއްބަސްވުމަށް ޢަމަލުކުރަން ފެށުމާއެކު މި ޑިއުޓީ އެއްކޮށް މާފުކުރެވިގެންދާނެއެވެ.

މިނިސްޓްރީން ފާހަގަކުރެއްވި ގޮތުގައި، މި ބަދަލާ ގުޅިގެން ރާއްޖޭގެ ބާޒާރުގައި ފަރުނީޗަރު ވިއްކާ އަގު ހެޔޮވެގެންދާނެއެވެ. އަދި އަމިއްލަ ފަރުދުން ފަރުނީޗަރު އެތެރެކުރުމަށް ކުރަންޖެހޭ ޚަރަދުތައްވެސް ކުޑަވެގެންދާނެއެވެ.

ރާއްޖެއާއި ޗައިނާ ދެމެދު ސޮއިކުރެވުނު މި މިނިވަން ވިޔަފާރީގެ އެއްބަސްވުމަށް ޢަމަލުކުރަން ފަށާނީ 2025 ވަނަ އަހަރުގެ ޖެނުއަރީ މަހުގެ 1 ވަނަ ދުވަހުއެވެ.

މީގެ އިތުރުން، މި އެއްބަސްވުމާއެކު ދިވެހި ވިޔަފާރިވެރިންނަށް ޗައިނާގައި ރީޓެއިލް އައުޓްލެޓް ހުޅުވައިގެން ޚިދުމަތް ދިނުމުގެ ފުރުޞަތު ލިބިގެންދާނެ ކަމަށްވެސް އިކޮނޮމިކް މިނިސްޓްރީން ފާހަގަކުރެއްވިއެވެ. މިއީ ދިވެހި އުފެއްދުންތައް ޗައިނާގެ ބާޒާރުގައި ސޯކޭސްކޮށް ވިއްކުމަށް ލިބިގެންދާނެ މުހިންމު ފުރުޞަތެކެވެ.

މި އެއްބަސްވުމަކީ ދެ ޤައުމުގެ ވިޔަފާރީގެ ގުޅުން އިތުރަށް ބަދަހިކޮށް، އިޤްތިޞާދީ ގޮތުން ދެ ޤައުމަށްވެސް ފައިދާ ލިބިގެންދާނެ މުހިންމު އެއްބަސްވުމެކެވެ.