ވޭޕް ބޭނުންކުރި 9 މީހަކު ޖޫރިމަނާކޮށްފިއެވެ.

ދުންފަތް ކޮންޓްރޯލް ކުރުމާ ބެހޭ ގާނޫނަށް އަމަލުކުރަން ފެށިފަހުން މިއަދަށް ހަފްތާއެއްހާ ދުވަސް ވެފައިވާއިރު، މީޑިއާތަކަށް މިއަދު ފޮނުވި މެސެޖެއްގައި ފުލުހުން ވިދާޅުވީ، އާދިއްތަ ދުވަހުގެ ނިޔަލަށް ދުންފަތް ކޮންޓްރޯލް ކުރުމާ ބެހޭ ގާނޫނާ ހިލާފުވި 9 މީހަކު ޖޫރިމަނާކޮށްފައިވާ ކަމަށެވެ. އެއީ ޖުމްލަ 50،000 ރުފިޔާ އެވެ.

އެ މީހުންގެ ތެރެއިން އެކަކު ސައިކަލު ދުއްވަމުން އިލެކްޓްރޯނިކް ސިނގިރެޓެއް ބޭނުން ކުރުމާ ގުޅިގެން 10،000 ރުފިޔާއިން ޖޫރިމަނާކޮށްފައިވާ ކަމަށް ފުލުހުން ވިދާޅުވިއެވެ. އެ ޖޫރިމަނާކުރީ ދުންފަތް ކޮންޓްރޯލް ކުރުމާ ބެހޭ ގާނޫނަށް 1 ވަނަ އިސްލާހު ގެނައުމުގެ ގާނޫނާ އެއްގޮތްވާ ގޮތުގެ މަތިންނެވެ.

މީގެކުރިން ފުލުހުން ވިދާޅުވީ، ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު މޯބައިލް ފޯނުގެ ޒަރިއްޔާއިން ކުރު މެސެޖެއް މެދުވެރިކޮށް ފޮނުވާނެ ކަމަށެވެ. އަދި އެ މެސެޖުގައި، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމެނިފައިވާނެ ކަމަށް ފުލުހުން ވިދާޅުވެފައިވެއެވެ.