ފުލުހުންނާއި އެންޓިކޮރަޕްޝަން ކޮމިޝަން އޭސީސީ އިން ކުރިއަށްގެންދާ ގެދޮރުވެރިޔާ އަދި ބިންވެރިޔާ ސްކީމާ ގުޅޭ މައްސަލައިގެ ޖިނާއީ ތަހުގީގަށް މަގުފަހި ކުރުމަށްޓަކައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަކިކުރި 15 މުވައްޒަފުންނަށް އަލުން ވަޒީފާ ދީފި އެވެ.

ފުލުހުންނާއި އެންޓިކޮރަޕްޝަން ކޮމިޝަން އޭސީސީ އިން ކުރިއަށްގެންދާ ގެދޮރުވެރިޔާ އަދި ބިންވެރިޔާ ސްކީމާ ގުޅޭ މައްސަލައިގެ ތަހުގީގަށް އެކުންފުނިން 15 މުވައްޒަފުން ވަކިކޮށްފައި ވަނީ މިމަހުގެ 22 ވަނަ ދުވަހު އެވެ. އެޗްޑީސީގެ އޮފިޝަލަކު ވިދާޅުވީ އެ މީހުންނަށް ވަޒީފާ އަލުން ދިނީ އެމީހުންނަކީ މި މައްސަލައާއި ގުޅުމެއް ނެތް ބަޔަކަށް ވާތީ އެވެ. އެހެން ނަމަވެސް އެމައްސަލައާއި ގުޅުން އޮންނަ މީހުންނަ މެދު ފިޔަވަޅު އަޅަނެ ކަމަށް އޮފިޝަލް ވިދާޅުވި އެވެ.

ބިންވެރިޔާ ސްކީމްގެ ދަށުން ގޯތި ލިބޭ މީހުންގެ ލިސްޓުގައި ނުހިމެނޭ ފަރާތްތަކަކަށް ގޯތި ދިންކަމަށް ތުހުމަތުކުރެވޭ މައްސަލައިގައި ޕްރޮސެކިއުޓަ ޖެނެރަލް އައްބާސް ޝަރީފްގެ އަމުރަކަށް ފުލުހުން ވަނީ ޖިނާއީ ތަހުގީގެއް ފަށާފަ އެވެ. ތަހުގީގަށް ޖާގަ ދިނުމުގެ ގޮތުން އެޗްޑީސީން ވަކި ކުރި މުވައްޒިފުންގެ ތެރޭގައި ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން ވެސް ހިމެނެ އެވެ.

އެޗްޑީސީގެ 15 މުވައްޒިފުން ވަކިކުރި އިރު މި މައްސަލައާ ގުޅިގެން ތަހުގީގު ނިމި އެ ބޯޑުން ވަކި ގޮތެއް އަންގަންދެން އެ ކުންފުނީގެ ޗެއާމަން އަހްމަދު ނާސިފު ފިޔަވާ އެޗްޑީސީގެ ޑިރެކްޓަރުންގެ ބޯޑުގެ ހުރިހާ މެންބަރުން ވަނީ ސަސްޕެންޑްކޮށްފައެވެ. ޑިރެކްޓަރުންގެ ބޯޑު ސަސްޕެންޑް ކޮށްފައިވަނިކޮށް ކުންފުނީގެ މެނޭޖިސްގް ޑިރެކްޓަރ އިބްރާހީމް ފަޒުލް ރަޝީދު ވަނީ މަގާމުން އިސްތިއުފާ ދެއްވާފަ އެވެ.

އެޗްޑީސީގެ ބޯޑު މެމްބަރުން ސަސްޕެންޑް ކުރުމަށް ފަހު އިއްޔެ ވަނީ ޑިރެކްޓަރުންގެ ބޯޑުގެ ހުރިހާ މެންބަރުންގެ ސަސްޕެންޝަން ވަނީ ނިމުމަކަށް ގެނެސްފަ އެވެ.

ބިންވެރިޔާ ސްކީމްގެ ދަށުން ގޯތި ލިބޭ މީހުންގެ ލިސްޓުގައި ނުހިމެނޭ ފަރާތްތަކަކަށް ގޯތި ދިންކަމަށް ތުހުމަތުކުރެވޭ މައްސަލައިގައި ފަޒުލް ހިމެނޭހެން 20 މީހެއްގެ ޕާސްޕޯޓު ވަނީ ހިފަހައްޓާފަ އެވެ.

މިމައްސަލާގައި ދެން ތުހުމަތު ކުރެވެނީ ފަޒުލްގެ ބޭބެ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު ފަޒީލް ރަޝީދަށެވެ. އޭނާވެސް މިހާރު ވަނީ މަގާމުން ސަސްޕެންޑް ކޮށްފަ އެވެ.