ސުނާމީ ކާރިސާގައި ނިޔާވި މީހުންނާއި ގެއްލިދިޔަ މީހުންގެ ހަނދާނުގައި މުޅި ރާއްޖޭގައި ހަމަ ހިމޭންކަމުގެ ސުކޫތެއް ގެނައުމަށް ސަރުކާރުން ނިންމައިފިއެވެ.

މާދަމާ ހެނދުނު 9:23 ގައި މި ސުކޫތު ގެންނައިރު މާލޭގައި މި ސުކޫތު ގެނައުން ރަސްމީކޮށް ކުރިއަށްގެންދާނީ ހުރަވީ ބިލްޑިން ހުރި ތަނުގައެވެ. މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ވަޒީރުންނާއި ސަރުކާރުގެ އިސްބޭފުޅުންނާއި އޮފީސްތަކުގެ ބޭފުޅުން ބައިވެރިވާނެކަަމަށް ސަރުކާރުން މައުލޫމާތުދެއެވެ.

އަދި އަތޮޅުތެރޭގައި ނަމަ ސުކޫތުގައި ބައިވެރިވުމަށް ނިކުންނާނީ އެރަށްރަށުގައި ހުންނަ ސޭފް ޒޯން ސަރަހައްދުތަކަށެވެ. ސުކޫތު ނިންމާލުމަށްފަހު މުޅި ރައްޖޭގައި އެއްބައިވަންތަކަމުގެ އަތުގުޅާލުމުގެ ހަރަކާތެއް ކުރިއަށްގެންދާނެއެވެ.

ސުނާމީ ކާރިސާ ހިނގި ދުވަސް، ޑިސެމްބަރު 26 ވަނަ ދުވަސް، މިހާރު އަންނަނީ ޤައުމީ އެއްބައިވަންތަކަމުގެ ދުވަހުގެ ގޮތުގައި ފާހަގަކުރަމުންނެވެ. މިއީ ސުނާމީގައި ދިވެހިން ދެއްކި އެއްބައިވަންތަކަމާއި އަޚުވަންތަކަމާ ގުޅިގެން ފާހަގަކުރާ ދުވަހެކެވެ.

މި އަހަރަކީ ސުނާމީ ކާރިސާ ހިނގިތާ 20 އަހަރު ފުރޭ އަހަރު ކަމަށްވާތީ، މި ޚާއްޞަ ސުކޫތުގެ އިތުރުން އެހެނިހެން ހަނދާނީ ހަރަކާތްތައް ވެސް ބޭއްވުމަށް ވަނީ ރޭވިފައެވެ. މީގެ ތެރޭގައި ސުނާމީގައި ގެއްލުނު މީހުންގެ ހަނދާނުގައި ފޮޓޯ މައުރަޒެއް ބޭއްވުމާއި، ސުނާމީ ކާރިސާއާ ގުޅޭ ޑޮކިއުމެންޓަރީއެއް ދެއްކުން ހިމެނެއެވެ.

މާދާމާގެ އިތުރު ހަރަަކާތްތަކުގެ ތެރޭގައި ނޭޝަނަލް ޑިޒާސްޓަރ މެނޭޖުމަންޓް އޮތޯރިޓީ (އެންޑީއެމްއޭ)ގެ ފަރާތުން އިންތިޒާމުކޮށްގެން ސުނާމީ ހަރަކާތްތައް ދައްކުވާދޭ ފޮޓޯ މައުރަޒު "ވިލުންވެރި 20" ހުޅުވުން )ނެޝަނަލް އާޓް ގެލެރީގައި ބޭއްވުމަށް ވަނީ ހަމަޖެހިފައެވެ. މި މައުރަޒު ހުޅުއްވައި ދެއްވާނީ ރައީސުލްޖޮމްހޫރިއްޔާ ގެ ނާއިބު އަލްއުސްތާޛު ޙުސައިން މުޙައްމަދު ލަޠީފެވެ. އަދި މައުރަޒު ކުރިއަށް ގެންދިޔުމަށް ހަމަޖެހިފައިވަނީ ޑިސެންބަރު 26 އިން ޑިސެންބަރު 29 ގެ ނިޔަލަށެވެ.

އަދި މި ދުވަހު އެއްބަޔަކު އަނެއްބަޔަކަށް އެހީ ފޯރުކޮށްދިނުމާއި ޤައުމީ އެއްބައިވަންތަކަން ރަމްޒުކޮށްދޭ ފަދަ ޙަރަކާތެއް ރާއްޖޭގެ ހުރިހާ ރަށެއްގައި ވެސް ކުރިއަށް ގެންދިއުމުގެ ގޮތުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ލިމިޓެޑްގެ ފެރީ ނިޒާމު މެދުވެރި ކޮށް އެއް ރަށުން އަނެއް ރަށަށް ކޭން ނުވަތަ ތަށި ބަރި އެއް ނުވަތަ ހަދިޔާއެއް ގެންގޮސްދިނުމުގެ އިންތިޒާމު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ލިމިޓެޑުން ހަމަޖައްސަވައި ދެއްވާފައި ވާތީ ، ކޭން ތަށިބަރި ނުވަތަ ހަދިޔާ ތައްޔާރުކޮށ،ް އެއް ރަށުން އަނެއް ރަށަށް ފޮނުވުން ވެސް ވަނީ ހަމަޖެހިފައެވެ.