ބާސެލޯނާގެ ފޯވަޑް ފެރަން ޓޯރެސްއަށް ކަށިގަނޑުގެ އަނިޔާއެއް ލިބިފައިވާ ކަމަށް ކްލަބުން ހާމަކޮށްފިއެވެ. މި އަނިޔާ ލިބުނީ އެޓްލެޓިކޯ މެޑްރިޑާ ދެކޮޅަށް ކުޅުނު މެޗުގައެވެ.

އިއްޔެ (އަންގާރަ) ދުވަހު ބާސެލޯނާއިން ނެރުނު ބަޔާނެއްގައި ބުނެފައިވަނީ ޓޯރެސްއަށް ލިބުނު އަނިޔާގެ ސަބަބުން އޭނާ ކުޅުމަށް އަނބުރާ އާދެވޭނެ ދުވަހެއް މިވަގުތު ކަނޑައެޅިފައި ނުވާ ކަމަށެވެ. ބާސެލޯނާގެ ދެން އޮތް މެޗަކީ ޖެނުއަރީ 4 ވަނަ ދުވަހު ކޯޕާ ޑެލް ރޭގައި ކުޅޭ މެޗެވެ.

ސްޕެއިންގެ ފޯވަޑް ޓޯރެސްއަށް މި އަނިޔާ ލިބުނީ ހޮނިހިރު ދުވަހު ކުޅުނު މެޗުގައި ދެވަނަ ހާފުގައި ބަދަލުވެގެން އައިސް ކުޅެމުން ދަނިކޮށެވެ. އެ މެޗުގައި ބާސެލޯނާ ވަނީ 2-1 އިން ބަލިވެފައެވެ. މި ސީޒަނުގައި ޓޯރެސް ވަނީ 16 މެޗެއްގައި ކުޅެ 5 ގޯލާއި 2 އެސިސްޓް ހޯދާފައެވެ.

ބާސެލޯނާ މިހާރު ދަނީ ވަރަށް ދެރަ ނަތީޖާތަކެއް ނެރެމުންނެވެ. ފާއިތުވި 6 މެޗުގެ ތެރެއިން އެންމެ މެޗެއްގައި ކާމިޔާބު ހޯދި ބާސެލޯނާ ވަނީ ލީގުގެ އެއްވަނަ ގެއްލުވާލާފައެވެ. އަދި އެންމެ ފަހުން އަމިއްލަ ދަނޑުގައި ކުޅުނު މެޗުތަކުގައި އެޓްލެޓިކޯ މެޑްރިޑް، ލެގަނޭސް އަދި ލަސް ޕަލްމަސް އަތުން ވަނީ ބަލިވެފައިވެއެވެ.