މި ސީޒަންގެ ފުރަތަމަ އެލް ކްލެސިކޯ މެޗު މިރޭ ރާއްޖެ ގަޑިން 12:00 ޖަހާއިރު މެޑްރިޑްގެ ބާނަބާއު ސްޓޭޑިއަމްގައި ކުޅޭނެއެވެ. މި މެޗަށް ނިކުންނައިރު ލީގުގެ އެއްވަނައިގައި އޮތް ބާސެލޯނާ އާއި ދެކޮޅަށް ކުޅޭނީ ދެވަނައިގައި އޮތް ރެއާލް މެޑްރިޑްއެވެ. މި ދެޓީމު ދެމެދުގައި ތިން ޕޮއިންޓުގެ ފަރަގެއް އެބައޮތެވެ. އަދި މި މެޗުން މޮޅުވެއްޖެނަމަ ރެއާލް މެޑްރިޑަށް ބާސެލޯނާއާއި ޕޮއިންޓުގެ ގޮތުން ހަމަކުރުމަށް ފުރުސަތު ލިބިގެންދާނެއެވެ.އެލް ކްލެސިކޯ މެޗަށް މި ދެޓީމު ނިކުންނައިރު މިއީ ފަހުގެ ތާރީޚެއްގައި މި ދެޓީމު ދެމެދުގައި ކުޅޭނެ އެންމެ ވާދަވެރި މެޗަށް ވެގެންދާނެކަމަށް ބެލެވެއެވެ. އެގޮތުން ބާސެލޯނާއިން ވަނީ މި ސީޒަންގައި ލީގުގައި ކުޅުނު 10 މެޗުގެ ތެރެއިން 9 މެޗުން މޮޅުވެ ތާވަލުގެ އެއްވަނައިގައި ހިފަހަށްޓާލަފައެވެ. ލީގުގައި އެންމެ ގިނަ ގޯލް ޖަހާފައިވަނީ ވެސް ބާސެލޯނާއިންނެވެ. އެގޮތުން އެޓީމުން ވަނީ ޖުމްލަ 33 ގޯލް ޖަހާފައެވެ. ދެވަނަގައި އޮތް ރެއާލް މެޑްރިޑުން މި ސީޒަންގައި ލީގުގައި އެއްވެސް މެޗަކުން ބަލިވެފައި ނުވެއެވެ.

ލީގުގައި އެންމެ ފަހުން މެޑްރިޑް ބަލިވެފައިވަނީ މީގެ އެއް އަހަރު ކުރިން ސެޕްޓެންބަރު 2023 ގައި އެތްލެޓިކޯ މެޑްރިޑާ ދެކޮޅަށެވެ. އެހެންކަމުން މި މެޗުން ރެއާލް މެޑްރިޑުން ބަލި ނުވެ ހިފަހަށްޓާލެވިއްޖެނަމަ، ލީގުގައި 43 މެޗުން ބަލިނުވެ 2017 ވަނަ އަހަރުގައި ބާސެލޯނާއިން ހަދާފައިވާ ރެކޯޑާއި އެއްވަރުވާނެއެވެ.އާ ކޯޗު ހާންސި ފްލިކްގެ ދަށުން ބާސެލޯނާއިން ދަނީ މި ސީޒަންގައި ވަރުގަދަ އެޓޭކިން ފުޓުބޯޅައެއް ކުޅެމުންނެވެ. އެގޮތުން މި މެޗުން މޮޅުވެ ބާސެލޯނާގެ ތާރީޚުގައި ލީގު ފެށި އެންމެ ރަނގަޅު ފެށުމުގެ ރެކޯޑް ހެދުމުގެ ފުރުސަތު އެޓީމަށްވަނީ ލިބިފައެވެ.ލީގުގައި އެންމެފަހުން ބާސެލޯނާއިން ކުޚުނު މެޗުން ސެވިއްޔާއާ ދެކޮޅަށް ވަނީ 5 ލަނޑު ޖަހާފައެވެ. އަދި ޗެމްޕިއަންސް ލީގުގައި ބާސެލޯނާއިން ވަނީ ވަރުގަދަ ބަޔާން އާ ދެކޮޅަށް 4 ލަނޑު ޖަހާފައެވެ. ނަމަވެސް ޗެމްޕިއަންސް ލީގުގައި ޖަރުމަނު ޓީމަކާ ދެކޮޅަށް ކުޅެ ބޮޑު ސްކޯއަކުން މޮޅުވީ ހަމައެކަނި ބާސެލޯނާއެއް ނޫނެވެ. ރެއާލް މެޑްރިޑުން ވެސް ވަނީ ބޮރޫސިއާ ޑޯޓްމަންޑާ ދެކޮޅަށް ކުޅެ، 2-0 ގައި އޮވެ ފަހަތުން އަރައި 5 ގޯލް ޖަހާފައެވެ.

މި ސީޒަންގައި ބާސެލޯނާގެ ކުޅުންތެރިންކަމަށްވާ ލަމީން ޔަމާލް އަދި ރަފީނިޔާ އަންނަނީ މޮޅު ކުޅުމެއް ކުޅެމުންނެވެ. އެގޮތުން ޔަމާލް ވަނީ ލީގުގައި 4 ގޯލާއި 6 އެސިސްޓް ހަދާފައެވެ. އަދި ރަފީނިޔާ ވަނީ ލީގުގައި 5 ގޯލާއި 5 އެސިސްޓް ހަދާފައެވެ.

ސީޒަނުގައި މޮޅުކުޅުމެއް ދަށްކަމުން އަންނަ ޔަމާލް އާއި ރަފީނިޔާ. ފޮޓޯ؛ ފަބްރީޒިއޯ ރޮމާނޯ

ރެއާލް މެޑްރިޑްގެ މި ސީޒަންގައި އެންމެ ފާހަގަކޮށްލެވޭ ކުޅުންތެރިޔަކީ ވިނީޝިއަސް އެވެ. އެގޮތުން އޭނާވަނީ މި ސީޒަންގައި ލީގުގައި 5 ގޯލާއި 4 އެސިސްޓް ހަދާފައެވެ. އައި އެމްބާއްޕޭ ވަނީ ލީގުގައި 6 ގޯލާއި 1 އެސިސްޓް ހަދާފައެވެ.

ރެއާލް މެޑްރިޑްގެ ސުޕަސްޓާރ އެންބާއްޕޭ އަދި ވިނީޝިއަސް. ފޮޓޯ: ފަބްރީޒިއޯ ރޮމާނޯ

މި މެޗުގައި އަނިޔާގެ ސަބަބުން މެޑްރިޑުގެ ކުޅުންތެރިންކަމަށްވާ ގޯލް ކީޕަރު ކޯޓުވާ، ޑިފެންޑަރ ކަރަވަހާލް އަދި އެޓޭކަރ ރޮޑްރީގޯއަށް ނުކުޅެވޭނެއެވެ. އަދި ބާސެލޯނާގެ ކީޕަރު ޓާ ސްޓަގަން އާއި ޑިފެންޑަރު އަރައުހޯ އަށްވެސް ވަނީ އަނިޔާގެ ސަބަބުން މި މެޗު ގެއްލޭގޮތްވެފައެވެ.

ބާސެލޯނާއިން މެޑްރިޑާ ދެކޮޅަށް ނިކުންނައިރު އެންމެ ފަހުން ކުޅެވުނު އެލް ކްލެސިކޯގެ ތިން މެޗު ކާމިޔާބުކޮށްފައިވަނީވެސް ރެއާލް މެޑްރިޑުންނެވެ. އަދި މިދިޔަ ސީޒަންގެ ލީގާއި ޗެންޕިއަންސް ލީގުގެ ޗެންޕިއަންކަންވެސް ހޯދާފައިވަނީ ރެއާލް މެޑްރިޑުންނެވެ. ބާސެލޯނާއަށް މިދިޔަ 5 އަހަރު ލީގު ކާމިޔާބު ކުރެވިފައިވަނީ އެންމެ ފަހަރަކުއެވެ. އެހެންކަމުން މިމެޗަށް ބާސެލޯނާއިން ނިކުންނާނީ ސީދާ މޮޅަކަށްކަމަށް ޤަބޫލުކުރެވެއެވެ. އެހެންކަމުން މި މެޗަކީ ހުރިހާ ގޮތަކުން ބެލިޔަސް މިއީ ވަރަށް ފޯރިގަދަވާނެ މެޗެއްކަމަސް ބެލެވެއެވެ.