އެފްރިކަން ކަޕް އޮފް ނޭޝަންސްގެ ކޮލިފައިން މެޗަށް ލީބިޔާއަށް ދިޔަ ނައިޖީރީއާގެ ޓީމު 12 ގަޑިއިރު ވަންދެން އެއާޕޯޓުގައި ބަންދުކުރުމުގެ ސަބަބުން އެ މެޗު ބޮއެކަޓް ކުރަން ނައިޖީރިއާގެ ޓީމުން ނިންމައިފިއެވެ.

ލީބިޔާއާ ދެކޮޅަށް މާދަމާ ކުޅެން ހަމަޖެހިފައި އޮތް މެޗު ކުޅުމަށް ނައިޖީރީއާގެ ޓީމުން ލީބިޔާއަށް ދިޔައީ އިއްޔެއެވެ. އެގޮތުން އެ ޓީމު އެއާޕޯޓުގައި ބަންދުކުރީ، އެ ޓީމު ދާން އޮތް އެއާޕޯޓު ނޫން އެހެން އެއާޕޯޓަކަށް ގެންދިޔުމަށް ފަހުއެވެ.

އެކަމާ ގުޅިގެން ނައިޖީރިއާގެ އެފްއޭއިން ނެރުނު ބަޔާނެއްގައި ބުނީ، އެ ގައުމުގެ ޓީމުން ދާން އޮތް އެއާޕޯޓު ނޫން އެހެން އެއާޕޯޓަށް ފްލައިޓް ޖެއްސުމަށްފަހު، 12 ގަޑިއިރު ވަންދެން ގޭޓް ބަންދުކޮށް އެ ޓީމު އެއާޕޯޓުގައި ބަންދުކުރި ކަމަށެވެ. އަދި އެ 12 ގަޑިއިރުގެ ތެރޭގައި އެ ޓީމުގެ ކުޅުންތެރިންނަށް ފޯނު ބޭނުން ކުރެވޭނެ ގޮތެއް، ކާނެ އެއްޗެއް އަދި ފެން ވެސް ދީފައި ނުވާ ކަމަށާއި، އެ ޓީމު ތިބެން ހަމަޖެހިފައި އޮތް ހޮޓަލަށް ގެންދިޔުމަށް ވެސް އެއްވެސް ދަތުރުފަތުރެއް ހަމަޖައްސައިދީފައިނުވާ ކަމަށެވެ.

އެ ބަޔާނުގައި އެފްއޭއިން ވަނީ، އެ ޓީމު ޖެއްސި އެއާޕޯޓަކީ ވެސް ނުރައްކާތެރި އަދި ފަޅު އެއާޕޯޓެއްގެ ގޮތުގައި ސިފަކޮށްފައެވެ. އެގޮތުން އެ ޓީމު އަސްލު ދާން އޮތް ބެންގާޒީ އެއާޕޯޓަށް ޖައްސަނިކޮށް، އެ ފްލައިޓް އަލް އަބްރާގް އެއާޕޯޓަށް ޖެއްސުމަށް ނިންމުމާ މެދު ވެސް އެފްއޭއިން ވަނީ ނުރުހުން ފާޅުކޮށްފައެވެ.

އެ ޙާދިސާއާ ގުޅިގެން އެ ޓީމުގެ ކެޕްޓަން ވިލިއަމް ޓްރޫސް އެކޮންގް އަދި އެކި ކުޅުންތެރިން ވަނީ އޭގެ ނުރުހުން ފާޅުކޮށްފައެވެ. އެގޮތުން އެކޮންގް "އެކްސް"ގައި ކުރި ޕޯސްޓެއްގައި ބުނީ، ލީބިޔާގެ ސަރުކާރުން ނައިޖީރިއާގެ ކުޅުންތެރިންނާ މެދުގައި އެފަދައިން ޢަމަލުކުރީ އެއްވެސް ސަބަބެއް ނެތި ކަމަށާއި، އެކަންކަމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެ ޓީމުގެ ކުޅުންތެރިންނަށް ކުރި ކަންކަމަކީ މެޗުން ބަލިކުރުމުގެ ނިޔަތުގައި ކުރި ކަންތައް ކަމަށާއި، އެކަމުގެ ތެރެއިން އެގައުމުގެ ސަރުކާރުން އަންގައިގެން އެއާޕޯޓު ކައިރީގައި ހުރި ހޮޓެލްތަކުން ވެސް އެ ޓީމަށް ކޮޓަރިތަކެއް ދީފައިނުވާ ކަމަށެވެ.

އޭނާ ވަނީ އެ ޙާދިސާ ހިނގި ގޮތް، އެފްރިކާގެ ފުޓްބޯޅައިގެ މައި އިދާރާއިން ބަލައި ފިޔަވަޅު އަޅަން ޖެހޭ ބަޔަކަށް ފިޔަވަޅު އެޅުމަށް ގޮވާލާފާއެވެ.

ނައިޖީރީގައި އެ ޓީމުގައި އިނގިރޭސި ޕްރިމިއާ ލީގުގެ ފުރަތަމަ ޑިވިޝަންއަށް ކުޅޭ ގިނަ ކުޅުންތެރިން ހިމެނުނެވެ. އޭގެ ތެރޭގައި ލެސްޓާ ސިޓީއަށް ކުޅޭ ވިލްފްރެޑް އެންޑީޑީ، ނޮޓިންހަމް ފޮރެސްޓަށް ކުޅޭ އޮލާ އައިނާ އަދި ޓައިވާނޯ އަވިނިޔީ އަދި ފުލްހަމް އަށް ކުޅޭ އެލެކްސް އިވޯބީ އާއި ކެލްވިން ބަސީ ހިމެނެއެވެ.