ރައީސް ޑޮކްޓަރ މުޙައްމަދު މުޢިއްޒު، މިއަދު ވަޒީރުންގެ މަޖިލީހަށް ބަދަލުތަކެއް ގެންނަވައި، ބައެއް މިނިސްޓްރީތަކުގެ ނަންތައް ބަދަލުކުރައްވައިފިއެވެ.

އެ ބަދަލާ ގުޅިގެން މިއަދު ވަނީ އެ ވަޒީރުންނަށް މަގާމުގެ ފަތްކޮޅު އަރުވައި ވަޒީރުންގެ މަޖިލީހުގެ މެންބަރުކަމުގެ ހުވާ ލައިދެއްވާފައެވެ.

އެގޮތުން މިއަދު ވަޒީރުންގެ މަޖިލީހަށް ގެނައި ބަދަލުތަކަކީ:

- މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް އުވާލައްވައި އެ މިނިސްޓްރީގެ މަސައްކަތްތައް މިނިސްޓްރީ އޮފް ފިނޭންސް އެންޑް ޕްލޭނިން އަށް ބަދަލުކުރެއްވުމަށް ފަހު، އެ ވުޒާރާ ހިންގަވާނެ ވަޒީރަކަށް ޑޮކްޓަރ ޢަބްދުﷲ މުއްޠަލިބް ހަމަޖެއްސެވުން،

- ހައުސިން މިނިސްޓްރީގެ ޕްލޭނިންގެ މަސައްކަތްތައް ފިނޭންސް މިނިސްޓްރީގެ ދަށަށް ބަދަލުކުރައްވައި، އެ ވުޒާރާ ހިންގެވުމަށް މޫސާ ޒަމީރު ހަމަޖެއްސެވުމުގެ އިތުރުން،

- ހަޔާ އެޑިއުކޭޝަން މިނިސްޓްރީގެ ވަޒީރަކަށް ހުންނެވި ޑރ. މަރިޔަމް މާރިޔާ، އެގްރިކަލްޗާ މިނިސްޓްރީގެ ވަޒީރަކަށް ހަމަޖެއްސެވުމާއި،

- ހައުސިން މިނިސްޓަރަކަށް ހުންނެވި ޑރ. އަލީ ހައިދަރު، ހަޔާ އެޑިއުކޭޝަން މިނިސްޓްރީގެ ވަޒީރުކަމަށް ހަމަޖެއްސެވުމެވެ.

މި ބަދަލުތަކާ ގުޅިގެން ކުރިން ވަކި ވުޒާރާއެއްގެ ގޮތުގައި ހިންގި ހައުސިން މިނިސްޓްރީ ވަނީ އުވާލާފައެވެ. އަދި ފިނޭންސް މިނިސްޓްރީގެ ނަން ވެސް ވަނީ މިނިސްޓްރީ އޮފް ފިނޭންސް އެންޑް ޕްލޭނިންގ އަށް ބަދަލުކުރެވިފައެވެ.

އެ ބަދަލުތަކަށް ފަހު، މިއަދު ރައީސް ޑރ. މުޙައްމަދު މުޢިއްޒު ވަނީ އެ ވަޒީރުންނާ ރައީސް އޮފީހުގައި ބައްދަލުކުރައްވާފައި. މި ބައްދަލުކުރެއްވުމުގައި ރައީސް ވަނީ ކުރިއަށްއޮތް އަހަރަކީ ސަރުކާރުގެ މަސައްކަތްތައް މިހާރަށްވުރެ އިތުރަށް ހަރުދަނާކޮށް ބާރު ސްޕީޑުގައި ކުރިއަށްގެންދިއުމަށް ނިންމަވާފައިވާ އަހަރެއް ކަމުގައި ފާހަގަކުރައްވާފައެވެ.

އަދި މިނިސްޓްރީގެ އޮނިގަނޑު އެކުލަވާލުމުގައި ބަދަލުވާ މުވައްޒަފުންނަށް ދަތިނުވާނެގޮތަށް ކަންކަން ހަމަޖެއްސެވުމަށް އެމަނިކުފާނު ވަނީ ބާރުއަޅުއްވާފައެވެ.

މި ބަދަލާއެކު މިހާރު ސަރުކާރުގައި އޮންނަނީ 21 މިނިސްޓްރީއެކެވެ. މިއީ ވެރިކަމާ ހަވާލުވީ ފަހުން މި ހިނގި އަހަރަކާއި ދެ މަހެއްހާ ދުވަހުގެ ތެރޭގައި ކެބިނެޓަށް ގެނައި ދެވަނަ ބަދަލެވެ. ކުރިން ކެބިނެޓަށް ބަދަލު ގެނައީ ފިނޭންސް މިނިސްޓަރަކަށް ހުންނެވި ޑރ. މުހައްމަދު ޝަފީގު މަގާމުން އިސްތިއުފާ ދެއްވުމާ ގުޅިގެންނެވެ.

އެގޮތުން މީގެ ކުރިން ގެނައި ބަދަލަށް ބަލާއިރު، މި ސަރުކާރުގެ ފުރަތަމަ ފޮރިން މިނިސްޓަރަކަށް ހުންނެވި މޫސާ ޒަމީރު ފިނޭންސް މިނިސްޓަރަކަށް ބަދަލު ކުރައްވައި، މި ސަރުކާރުގެ ފުރަތަމަ ހެލްތު މިނިސްޓަރު ޑރ. އަބްދުﷲ ހަލީލް ފޮރިން މިނިސްޓަރަކަށް އޭރު ބަދަލުކުރެއްވިއެވެ.

އަދި ފަހުން ހެލްތު މިނިސްޓަރަކަށް އައްޔަންކުރެއްވީ ރައީސް އޮފީހުގެ މިނިސްޓަރަކަށް ކުރިން ހުންނެވި އަބްދުﷲ ނާޒިމް އިބްރާހިމެވެ.