ރާއްޖޭގެ ކަނޑުގެ ސަރަހައްދަށް ވަދެ އުޅުނު ބޭރުގެ މަސް ބޯޓެއް ޑްރޯން ބޭނުން ކޮށްގެން ހޯދައި ، އެމްއެންޑީއެފުން އެ ބޯޓު ހުއްޓުވައިފިއެވެ.

އެމްއެންޑީއެފުން އެކްސްގައި ކުރި ޕޯސްޓެއްގައި ބުނީ، ރާއްޖޭގެ ޚާއްޞަ އިގުތިސާދީ ސަރަހައްދު ބެލެހެއްޓުމަށް ހިންގި އޮޕަރޭޝަނެއްގައި، ގާނޫނާ ޚިލާފަށް އެ ސަރަހައްދުގައި ހަރަކާތްތެރިވަމުންދިޔަ ބޭރުގެ މަސްބޯޓެއް އެއާ ކޯ ޑްރޯންގެ އެހީގައި ހޯދައިފައިވާ ކަމަށެވެ.

އެ ބޯޓުގައި ތިބީ ކިތައް މީހުން ކަމެއް އަދި އެ ބޯޓަކީ ކޮން ގައުމެއްގެ ބޯޓެއް ކަމެއް އެމްއެންޑީއެފް އިން ހާމަކޮށްފައި ނުވެއެވެ.

ސިފައިން ވަނީ، ޑްރޯންގެ އެހީގައި އެ ބޯޓު އޮތް ހިސާބެއް ހޯދިއިރު ފެނުނު މަންޒަރުތަކުގެ ފޮޓޯތަކެއް ވެސް ހިއްސާކޮށްފައެވެ.

އެ ބޯޓު ހޯދުމަށް ފަހު، އެ އުޅަނދު މިހާރު ކޯސްޓްގާޑުގެ ބެލުމުގެ ދަށަށް ގެންގޮސްފައިވާ ކަމަށް އެމްއެންޑީއެފުން ބުންޏެވެ.

މީގެކުރިން ވެސް ޑްރޯން ބޭނުން ކޮށްގެން ވަގަށް އެތެރެވެގެން އުޅުނު ބޭރުގެ މަސް ބޯޓެއް އެމްއެންޑީއެފް އިން ހޯދާފައިވެއެވެ.