ފެނަކަ ކޯޕަރޭޝަންގެ ތެރެއިން ކުރިން ހިންގާފައި ހުރި ކޮރަޕްޝަންގެ ސަބަބުން ގެއްލިފައިވާ ފައިސާ ހޯދުމާއި ފެނަކައިގެ ކުރީގެ ވެރިން ހިމެނޭ ސީރިއަސް ގިނަ މައްސަލަތަކެއްގައި ދަޢުވާކުރުމާއި މެދު ގޮތެއްނިންމަން ޕޮރޮސެކިއުޓަރ ޖެނެރަލް އޮފީހާއިއެކު މަޝްވަރާ ކުރަމުން އަންނަ ކަމަށް އެންޓީކޮރަޕްޝަން ކޮމިޝަން (އޭސީސީ) އިން ބުނެފި އެވެ.

އޭސީސީ އިން މިހެން ބުނެފައިވާ އިރު ފެނަކަ ކޯޕަރޭޝަންގެ ކުރީގެ މެނޭޖިންގް ޑީރެކްޓަރ އަހުމަދު ސައީދުގެ މައްޗަށް ދައުވާކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހުން މިއަދު ވަނީ ކްރިމިނަލް ކޯޓަށް ފޮނުވާފަ އެވެ.

މިކަމާ ގުޅިގެން އޭސީސީ އިން ބުނީ މި މައްސަލައިގައި ފެނަކަ އަށް ކޮރަޕްޝަނުގެ ސަބަބުން ގެއްލިފައިވާ ފައިސާ ހޯދުމަށް ކަމާގުޅުން ހުރި އިދާރާތަކަށް އެންގުމަށް ނިންމާފައިވާ ކަމަށެވެ.

ފެނަކައިގެ ކުރީގެ ވެރިން ހިމެނޭ ކޮރަޕްޝަންގެ ސީރިއަސް މައްސަލަތަކެއް ހުރި ކަމަށްވެސް އޭސީސީ އިން ބުނެ އެވެ. އޭސީސީ އިން ބުނީ މިއަދު ޕީޖީ އޮފީހުން ފެނަކައިގެ ކުރީގެ މެނޭޖިންގް ޑިރެކްޓަރ ސައީދުގެ މައްޗަށް ދައުވާ ކުރުމަށް ފޮނުވާފައިވާ މައްސަލައިގެ އިތުރުން ފެނަކައިގެ ކުރީގެ ވެރިން ހިމެނޭ ސީރިއަސް ގިނަ މައްސަލަތަކެއްގައި ދަޢުވާކުރުމާއި މެދު ގޮތެއް ނިންމަން ޕޮރޮސެކިއުޓަރ ޖެނެރަލް އޮފީހާއިއެކު މަޝްވަރާ ކުރަމުންގެންދާ ކަމަށެވެ.