ފާޚަނާގެ ފެން ލައިޓުން ކޮޓަރިއަށް ވަދެ، ނިދާފައި ތިބި މީހުންނަށް ވަޅިން ބިރު ދައްކައި ވައްކަން ކުރި ދެ މީހަކު ފުލުހުންގެ ބެލުމުގެ ދަަށަށް ގެންގޮސްފިއެވެ.

ފުލުހުން ބުނީ، މާފަންނު ގެއެއްގެ ފާޚަނައެއްގެ ފެން ލައިޓްއިން ކޮޓަރިއަކަށް ވަދެ، އެ ކޮޓަރީގައި ނިދާފައި ދެ މީހެއްގެ ކަރުގައި ވަޅި ޖައްސައި ބިރު ދެއްކުމަށްފަހު ވައްކަން ކުރި ދެ މީހަކު ފުލުހުންގެ ބެލުމުގެ ދަށަށް މިއަދު ގެނެސްފައިވާކަމަށެވެ.

އެގޮތުން އިއްޔެ ރިޕޯޓުކުރި މި މައްސަލައިގައި ފުލުހުންަގެ ބެލުމުގެ ދަށަށް ގެނައީ، އުމުރުން 32 އަހަރުގެ ހުސައިން ޝާފިއު (ވިދުވަރު، ބ. ދަރަވަންދޫ) އަދި އުމުރުން 30 އަހަރުގެ އިސްމައީލް ވިޝާލް (މ. ދާރުލްގަރާރު، މާލެ ސިޓީ)އެވެ. އެ ދެ މީހުން ވަނީ އެ ގެއަށް ވަދެ، ދެ މީހަކަށް ވަޅިން ބިރުދައްކައި އަދި ހަރަކާތެއް ކޮށްފިނަމަ މަރާލާނެ ކަމަށް ބުނެ އިންޒާރުވެސް ދީފައެވެ. އަދި އެކަމުގެ ތެރެއިން އެ މީހުން ބިރުދެއްކި ދެ މީހުންގެ ފޯނާއި، ލެޕްޓޮޕުގެ އިތުރުން، އިތުރުތަކެތި ވެސް ފޭރިގަނެފައެވެ.

އެ މީހުން އެ އެއްޗެހި ފޭރުމަށްފަހު ފިލައިގެން ގޮސްފައިވަނީ ފާޚަނާއަށް ވަދެ، އެތެރެއިން ތަޅުލައި ފެން ލައިޓުން ނުކުމެގެން ކަމުގައި ވެސް ފުލުހުން ބުންޏެވެ.

އެހެން ނަމަވެސް އެ ދެ މީހުން ވަގަށް ނެގި ތަކެތި ފުލުހުން މިއަދު ވަނީ ހޯދާފައެވެ. އޭގެ އިތުރުން ވެސް، އެ ދެ މީހުން ވަގަށް ނަގާފައިވާ ކަމަށް ބެލެވޭ އިތުރު ތަކެތި ވެސް އެ މީހުންގެ އަތުން ފެނިފައިވާ ކަމަށް ފުލުހުން ބުންޏެވެ.

އެ މައްސަލަ ފުލުހުން ގެންދަނީ ތަހުގީގު ކުރަމުންނެވެ.