މި ދުވަސްވަރަކީ ބޭރުގެ ގައުމުތަކަށް ފިނި ދުވަސްވަރަކަށް ވުމާއި ކުރިއަށް އޮތީ އައު އަހަރަށް ވުމާއެކު، ވެލާނާ ބައިނަލްއަގުވާމީ އެއާޕޯޓަށް އައި މަހުޖަނުންގެ އަމިއްލަ ޖެޓުތަކުން އެއާޕޯޓު ފުރިއްޖެއެވެ.

މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ ދަށުން ހިންގާ ވެލާނާ އެއާޕޯޓުން ބުނީ، މި އަހަރުގެ ޑިސެމްބަރުގެ ނިޔަލަށް އެކަނި ވެސް 148 ޖެޓު އައިސްފައިވާއިރު، އެއީ މިދިޔަ އަހަރުގެ ޑިސެމްބަރު މަހު، ވެލާނާ އެއާޕޯޓަށް އައި ޖެޓުތަކަށް ވުރެ އަށް އިންސައްތަ އިތުރު އަދަދެއް ކަމަށެވެ.

މިދިޔަ އަހަރުގެ ޑިސެމްބަރު މަސް ނިމެން ދިޔައިރު، ރާއްޖެއަށް ޒިޔާރަތްކުރި އަމިއްލަ ފަރާތްތަކުގެ ޖެޓުތަކުގެ އަދަދުތައް ހުރީ 140 ގައެވެ. އެހެން ނަމަވެސް މުޅި މި އަހަރަށް ބަލާއިރު ވެސް، ރާއްޖެއަށް އައި ޖެޓުތަކުގެ އަދަދު ވަނީ މުޅި މިދިޔަ އަހަރަށް ވުރެ ގާތްގަޑަކަށް 10 އިންސައްތަ އިތުރުވެފައެވެ.

އެގޮތުން މި އަހަރުގެ މިހާތަނަށް ރާއްޖެއަށް 2،326 ޖެޓެއް މޫވްމެންޓްސް ރެކޯޑުކުރެވިފައިވާއިރު، މިދިޔަ އަހަރުގެ މި މުއްދަތުގައި ރެކޯޑުކުރެވިފައިވަނީ 2،107 ޖެޓެވެ.

ކޮންމެ އަހަރެއްގެ ވެސް ޑިސެމްބަރުން އޭޕްރީލް އަކީ ރާއްޖޭގެ ފަތުރުވެރިކަމުގެ ޕީކް ދުވަސްވަރަށް ވެފައި، އެ ދުވަސްވަރަކީ ރާއްޖެއަށް ޢާންމު ގޮތެއްގައި ހޫނު ގަދަ ދުވަސްވަރަކަށް ވުމުން، ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތްކުރެއެވެ. އޭގެ ނަތީއްޖާއެއްގެ ގޮތުން ރާއްޖޭގެ މައި ބަނދަރު، ވެލާނާ އެއާޕޯޓުގައި ޕަސެންޖަރުންގެ މޫވްމަންޓް ވަރަށް ބޮޑަށް އިތުރުވާ ކަމުގައި ވެލާނާ އެއާޕޯޓުގެ ތަފާސް ހިސާބުތަކުން ދައްކައެވެ.

އެގޮތުން މިދިޔަ އަހަރާ އަޅާބަލާއިރު ވެލާނާ އެއާޕޯޓަށް އައި ފަސިންޖަރުންގެ އަދަދު މި އަހަރުގެ މިހާތަނަށް ވަނީ ނުވަ އިންސައްތަ އިތުރުވެފައެވެ.

މި އަހަރު ނިމެންދާއިރު، މިހާތަނަށް ރާއްޖެއަށް ވަނީ 2.034 މިލިއަނަށް ވުރެ ގިނަ ފަތުރުވެރިން ޒިޔާރަތްކޮށްފައެވެ. އެގޮތުން ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން މާކެޓުގެ 12.9 އިންސައްތައާ އެކު، އެންމެ ގިނައިން އައިސްފައިވަނީ ޗައިނާގެ ފަތުރުވެރިންނެވެ. ޗައިނާގެ ފަތުރުވެރިންނަށް ވުރެ ގާތްގަޑަކަށް 30،000 ޕަސިންޖަރުން މަދުން އައިސްގެން ދެވަނައަށް އެންމެ ގިނަ ފަތުރުވެރިން އައިސްފައިވަނީ ރަޝިޔާއިންނެވެ.

އެއާއެކު މި އަހަރަށް ސަރުކާރުން ކަނޑައެޅި، ދެ މިލިއަން ފަތުރުވެރިންގެ އަމާޒަށް ވަނީ ވާސިލްވެފައެވެ.