ހަންގޭރީގައި ކިޔެވުމަށް 25 ސްކޮލަރޝިޕަށް ހަޔަރ އެޑިޔުކޭޝަން މިނިސްޓްރީން ހުޅުވާލައިފިއެވެ.

އެ މިނިސްޓްރީން ކުރި އިއުލާނުގައި ބުނެފައި ވަނީ ހަންގޭރީކަމް ސްކޮލަރޝިޕްގެ ދަށުން ދެނީ، ބެޗްލަރސް ޑިގްރީގެ 8 ފުރުޞަތާއި މާސްޓަރސް ޑިގްރީގެ 14 ފުރުޞަތާއި ޕީއެޗްޑީ ނުވަތަ ޑީއެލްއޭގެ 3 ފުރުޞަތެވެ.

މި ސްކޮލަރޝިޕަށް ކުރިމަތި ލުމުގެ މުއްދަތު ހަމަވާނީ އަންނަ ޖެނުއަރީ މަހުގެ 15 ވަނަ ދުވަހުގެ 14:00 އަށެވެ. ހަޔަރ އެޑިޔުކޭޝަން މިނިސްޓްރީން ބުނީ، ކޮންމެ ކެންޑިޑޭޓަކު ވެސް ހުށަހަޅާނީ ފުލްޓައިމް އެންމެ ޕްރޮގްރާމަކަށް ކަމަށާއި ފައިނަލް ސިލެކްޝަން ހެދުމަށް ކެނޑިޑޭޓުން އެ މިނިސްޓްރީން ނޮމިނޭޓްކުރި ނަމަވެސް ފައިނަލް ސެލެކްޝަން ހަދާނީ ސްކޮލަރޝިޕް ދޭ ފަރާތުން ކަމަށެވެ.

ހަޔަރ އެޑިޔުކޭޝަން މިނިސްޓްރީގެ އިއުލާނުގައި ބުނެފައި ވަނީ، ނޮމިނޭޝަން ހަދާނީ ސްޓައިޕެންޑިއަމް ހަންގޭރިކަމްގެ ވެބްސައިޓު މެދުވެރިކޮށްނާއި މިނިސްޓްރީގެ "މައިއެޑިޔު" ޕޯޓަލް މެދުވެރިކޮށް ދެގޮތަށް ހުށަހަޅާފައިވާ އެޕްލިކޭޝަންތަކަށް ބަލައިގެންނެވެ.

ދެކޮޅު ޓިކެޓާއި ވިސާގެ ޚަރަދު ހަޔަރ އެޑިޔުކޭޝަން މިނިސްޓްރީން ހަމަޖައްސައި ދޭނެ ކަމަށް އެ އިއުލާނުގައި ބުނެފައިވެއެވެ. ސްކޮލަރޝިޕް ދޭ ފަރާތުން ހަމަޖައްސައިދޭ ޚަރަދުތަކުގެ ތަފުޞީލު ސްކޮލަރޝިޕްގެ މައުލޫމާތު ކަރުދާހުގައި ހިމަނާފައިވާނެ ކަމަށެވެ. އޭގެ އިތުރަށް ކުރަންޖެހޭ ޚަރަދުތައް ކުރަން ޖެހޭނީ އަމިއްލައަށެވެ.

-މި ސްކޮލަރޝިޕަށް "މައިއެޑިޔު" ޕޯޓަލް މެދުވެރިކޮށް އެޕްލިކޭޝަން ހުށައަޅާނީ 15 ޖަނަވަރީ 2025 ވާ ބުދަ ދުވަހުގެ 14:00 ކުރިންނެވެ. އަދި ސްޓައިޕެންޑިއަމް ހަންގޭރިކަމްގެ ވެބްސައިޓު މެދުވެރިކޮށް އެޕްލިކޭޝަން ހުށައަޅާނީ 15 ޖަނަވަރީ 2025 ވާ ބުދަ ދުވަހުގެ 18:00 ކުރިންނެވެ.

ހަންގޭރީކަމް ސްކޫލަރޝިޕާ ގުޅޭ މުހިންމު މައުލޫމާތު https://stipendiumhungaricum.hu/apply/ އިން ލިބޭނެއެވެ.