އައްޑޫ ސިޓީގައި ޤާއިމުކޮށްފައިވާ ފެން ހިންދާ ނިޒާމުގެ ޕަމްޕްތައް ނަގާ މާލެ ގެންނަން އުޅޭކަމަށް ދެކެވޭ ވާހަކަ އިމާރަތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ދޮގުކުރައްވައިފިއެވެ.

ވަޒީރު އެފަދައިން ވިދާޅުވީ އައްޑޫގެ ފެން ހިނދާ ނިޒާމު ޤާއިމުކުރުމަށް ބަހައްޓާފައިވާ ޕަމްޕްތައް މާލެ ގެންދިއުމަށް އުޅޭ ވާހަކަތަކެއް ސޯޝަލް މީޑިޔާގައި ފެންމަތިވުމާއި ގުޅިގެން އެކަން ދޮގު ކުރައްވާ އެކްސްގައި ކުރެއްވި ޕޯސްޓެގައެވެ. އެގޮތުން ވަޒީރު ވިދާޅުވީ އައްޑޫގެ ފެން ހިންދާ ނިޒާމުގެ މަސައްކަތްތައް އަދި މުޅިން ނުނިމޭ ކަމަށާއި ޕަމްޕް ސްޓޭޝަންތަކުގައި ބަހައްޓާ ޕަންޕްތައް އިންސްޓޯލްކުރުމާއި ޓެސްޓުކުރުމުގެ މަސައްކަތްތައް، ކޮންޓްރެކްޓަރު މިވަގުތު ވެސް ކުރަމުންދާކަމަށެވެ.

ވަޒީރު އެފަދައިން ވިދާޅުވިއިރު، އައްޑޫ ސިޓީގެ ފެން ހިންދާ ނިޒާމުގެ މަސައްކަތަކީ އިންޑިއާގެ އެފްކޮންސް ކުންފުންޏާ ހަވާލުކޮށް ކުރިއަށްގެންދާ އައްޑޫ މަގު ހެދުމުގެ މަޝްރޫޢުގައި ހިމެނޭ މަސައްކަތެކެވެ.ވިއްސާރަ ދުވަސްވަރު ފެންބޮޑުވުމުގެ މައްސަލައަކީ އައްޑުއަށް ދިމާވެފައިވާ ބޮޑު މައްސަލައެކެވެ. 100 ކިލޯމީޓަރުގެ މަގު ހެދުމަށް އައްޑޫގައި ފަށައިގެން ކުރިއަށްގެންދާ މަޝްރޫއުގައި މިހާރު މައިގަނޑު ގޮތެއްގައި ކުރަނީ މަޝްރޫޢުގެ އެންމެ ފަހުގެ މަސައްކަތްތަކެވެ. މީގެ ތެރޭގައި ޒަމާނީ ފެންދާ ނިޒާމުގެ މަސައްކަތްތައްވެސް ކުރިއަށްދެއެވެ.

އައްޑޫ މަގު ހެދުމުގެ މަޝްރޫޢުއަކީ އެއް ބިލިއަން ރުފިޔާގެ މަޝްރޫޢުއެކެވެ. މަޝްރޫޢުގައި އައްޑޫ ފެދޫ، މަރަދޫ، މަރަދޫ ފޭދޫ، ހިތަދޫ އަދި ހުޅުމީދޫގެ މަގުތައް ޒަމާނީ ފެންވަރަށް ތަރައްޤީކުރުމަށް ވަނީ ނިންމާފައެވެ.