ކަޅު ބާޒާރުގައި ޑޮލަރުގެ ވިޔަފާރިކުރަމުންދާ ބިދޭސީންތަކެއްގެ އަތުން ގިނަ އަދަދެއްގެ ފައިސާއާއި ޑެބިޓް އަދި ކްރެޑިޓް ކާޑުތަކެއް، ރާއްޖޭގެ އިމިގްރޭޝަނުން ހޯދައިފިއެވެ.

އެ ތަކެތި އިމިގްރޭޝަނުން ހޯދީ، އިމިގްރޭޝަންގެ ޓާސްކް ފޯސްއަށް ލިބުނު މައުލޫމާތަކާ ގުޅިގެން، ފުލުހުންނާ އެކު އެ އިދާރާއިން ހިންގި ހާއްސަ ރެއިޑެއްގައެވެ. އެގޮތުން އެ ރެއިޑުގައި އިމިގްރޭޝަނުން ވަނީ އެ އިދާރާގެ ބެލުމުގެ ދަށަށް ފަސް މީހަކު ވަނީ ގެންގޮަސްފައެވެ. އެ ފަސް މީހުންނަކީ ކަޅު ބާޒާރުގައި ޑޮލަރުގެ ވިޔަފާރިކުރަމުންދާ ބައެއް ކަމުގައި އިމިގްރޭޝަނުން ބުންޏެވެ.

އެ މައްސަލަ ފުލުހުންނާ ގުޅިގެން އެ އިދާރާއިން ތަހުގީގުކުރަމުން އަންނަ އިރު، އެކަމާ ގުޅޭ އިތުރު ތަފްސީލެއް އެ އިދާރާއިން ހާމަކޮށްފައެއް ނުވެއެވެ.

ރާއްޖޭގައި ގަވާއިދާ ޚިލާފަށް ދިރިއުޅޭ އަދި ވިޔަފާރިކުރާ ބިދޭސީން ރެއިޑުކޮށް، އެފަދަ ފަރާތްތަށް އިމިގްރޭޝަނުގެ ބެލުމުގެ ދަށަށް ގެންދިޔުމުގެ މަސައްކަތް އެ އިދާރާއިން ދަނީ ކުރަމުންނެވެ. އެފަދަ ފަރާތްތަށް ޑީޕޯޓުކުރުމުގެ މަސައްކަތް ވެސް އެ އިދާރާއިން ދަނީ ކުރަމުންނެވެ.