ފޮރިން މިނިސްޓަރު ހަލީލް އިންޑިއާއަށް ވަޑައިގެންފި
3 ޖެނުއަރީ 2025 - 06:58
ފޮރިން މިނިސްޓަރު ޑރ. އަބްދުﷲ ހަލީލް ރަސްމީ ދަތުރެއްގައި ރޭ އިންޑިއާއަށް ވަޑައިގެންފި އެވެ.
ހަލީލް "އެކްސް" ގައި ވިދާޅުވީ އިންޑިއާއަށް ކުރައްވާ ދަތުރަކީ އެ ގައުމުގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރުއާ ބައްދަލު ކުރެއްވުމަށް ކުރައްވާ ދަތުރުފުޅެއް ކަމަށެވެ.
ހަލީލް ވިދާޅުވީ މި ދަތުރުފުޅުގައި ދެ ގައުމުގެ ރައްޔިތުންގެ ލާބައާއި މަންފާއަށް ދެ ގައުމުގެ ދެމެދުގައި އޮތް ގުޅުން އިތުރަށް ބަދަހި ކުރުމަށް މަޝްވަރާތަކެއް ކުރެވޭނެ ކަމަށެވެ.
މިއީ މިދިޔަ އަހަރުގެ ސެޕްޓެމްބަރު 30، ގައި ފޮރިން މިނިސްޓަރުގެ މަގާމާ ހަލީލް ހަވާލުވެވަޑައިގެންނެވި ފަހުން ރަސްމީ ދަތުރުފުޅެއްގައި އިންޑިއާއަށް ވަޑައިގެންނެވި ފުރަތަމަ ފަހަރެވެ.
މިދިޔަ އަހަރު ފެށުނުއިރު ރާއްޖެ އާއި އިންްޑިއާއާ ދެމެދު އޮތް ގުޅުން ވަނީ ވަރަށް ބޮޑަށް ގޯސްވެފައެވެ. ނަމަވެސް ފަހުން ދެ ގައުމުގެ ގުޅުން މަޑުމަޑުން ރަނގަޅުވި އެވެ.
ދެ ގައުމުގެ ގުޅުން އިތުރަށް ބަދަހިވީ ޖަޔަޝަންކަރު ރާއްޖެއަށް ކުރެއްވި ރަސްމީ ދަތުރުގެ އިތުރުން ރައީސް ޑރ. މުހައްމަދު މުއިއްޒު އިިންޑިއާއަށް ކުރެއްވި ރަސްމީ ދަތުރަށްފަހު އެވެ.
