އިންޑިޔާގެ އެފްކޮމް ކާގޯ އާ ގުޅިގެން ވެލާނާ ބައިނަލްއަގުވާމީ އެއާޕޯޓުގައި ޗާޓާޑް ޝެޑިއުލްޑް ކާގޯ ޚިދުމަތް، އެ އެއާޕޯޓް ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ފަށައިފިއެވެ.

އެ ޚިދުމަތް ފަށާފައިވަނީ ރޭގެ ވަގުތެއްގައެވެ. އެގޮތުން އިންޑިޔާގެ ޗެންނާއީން ފުރި އެފްކޮމް ކާގޯގެ މަތިންދާ ބޯޓު، ރޭގެ ވަގުތެއްގައި ވަނީ 20 ޓަނުގެ ކާގޯ ވެލާނާ އެއާޕޯޓަށް އެތެރެކޮށްފައެވެ. މި ކާގޯތައް ރާއްޖެއިން ބޭރުކޮށްފައިވަނީ އެތިހާދު އެއާވޭސްގެ މަތިންދާ ބޯޓެއް މެދުވެރިކޮށެވެ.

މިކަމާ ގުޅޭ ގޮތުން އެމްއޭސީއެލް އިން ބުނި ގޮތުގައި، މި ޚިދުމަތުގެ ތެރެއިން އެފްކޮމް ކާގޯއިން، ވެލާނާ އެއާޕޯޓަށް ކޮންމެ ހަފުތާއަކު ތިން ފްލައިޓް އޮޕަރޭޓްކުރުމަށް ވަނީ ހަމަޖެހިފައެވެ. އަދި މި ޚިދުމަތުގެ އޮޕަރޭޝަން ކުރިއަށް އޮތް ތަނުގައި ފުޅާކުރުމަށް ނިންމާފައިވާއިރު، ވެލާނާ އެއާޕޯޓު މެދުވެރިކޮށް ކާގޯ މޫވްމަންޓް ހަރުދަނާކުރުމަށް ބޮޑެތި ބޭރުގެ އެއާލައިންތަކާއި އެކު އިންޓަލައިން އެއްބަސްވުންތައް ގާއިމްކުރުމުގެ މަސައްކަތް ކުރާނެ ކަމުގައި ވެސް އެމްއޭސީއެލް އިން ބުންޏެވެ.

އިންޑިޔާގެ އެފްކޮމް ކާގޯގެ އެފްކޮމް އެއާލައިންގެ ބޯޓު ވެލާނާ އެއާޕޯޓުން ކާގޯ ބާލަނީ -- ފޮޓޯ: ވެލާނާ އެއާޕޯޓު

އެމްއޭސީއެލް އިން ބުނި ގޮތުގައި އެ މަސައްކަތް ކުރިއަށް ގެންދަނީ އެފްކޮމް އެއާލައިންސްއާ ގުޅިގެންނެވެ.

އެމްއޭސީއެލް އިން އިތުރަށް ބުނި ގޮތުގައި، އެފްކޮމްއާއެކު ފެށުނު އެއާޓު-އެއާ ކާގޯގެ ޚިދުމަތާއެކު އެ އެއާޕޯޓުން ފޯރުކޮށްދޭ ކާގޯގެ ޚިދުމަތްވަނީ އިތުރަށް ފުޅާވެފައެވެ. އެގޮތުން ދުނިޔޭގެ ކާގޯ ކަނެކްޓިވިޓީ ލޮޖިސްޓިކްސް ޗެއިންގައި ވެލާނާ އެއާޕޯޓުގެ ޙިއްސާ އޮތުމަކީ ރާއްޖޭގެ އިގްތިސާދަށް އެމްއޭސީއެލް އިން ވަމުން އަންނަ ހިއްސާ އިތުރަށް ވަރުގަދަވާނެ ކަމެއް ކަމުގައި ވެސް އެ ކުންފުނިން ވަނީ ބުނެފައެވެ.

ރާއްޖޭގައި މުޅިން އަލަށް، ޗާޓާޑް ޝެޑިއުލްޑް ކާގޯގެ ތެރެއިން އެއާޓު އެއާ ކާގޯ ފެށިފައިވާއިރު، ވެލާނާ އެއާޕޯޓު މެދުވެރިކޮށް ސީޓުއެއާ ކާގޯ ވެސް ރާއްޖޭގައި ވަނީ މިދިޔަ އަހަރުގެ ފަހުކޮޅު ފަށާފައެވެ. އެގޮތުން އެ ޚިދުމަތް ފަށާފައިވަނީ އެއާޕޯޓާއި އެމްޕީއެލް ގުޅިގެންނެވެ.