ގޯލްޑަން ފުޓްސަލް މުބާރާތުގެ ގދ އަތޮޅުން ސެމީގައި ވާދަކުރާނެ ޓީމުތައް ކަށަވަރުވެއްޖެއެވެ. އެގޮތުން ގްރޫޕް އޭއިން އެއްވަނަ ޓީމުގެ ގޮތުގައި ސެމީއަށް ގޮސްފައިވަނީ ދާންދޫއެވެ. އަދި ގްރޫޕް ބީގެ އެއްވަނަ ޓީމެއްގެ ގޮތުގައި ސެމީއަށް ގޮސްފައިވަނީ ދެއްވަދޫއެވެ.

އިއްޔެ ކުޅުނު މިއަތޮޅުގެ ގްރޫޕް އޭގެ މެޗުތަކަށް ބަލާއިރު، ދާންދޫވަނީ ގެމަނަފުށި 3-1 އިން ބަލިކޮށްފައެވެ. އަދި ނިލަންދޫ ވަނީ މިދިޔަ އަހަރުގެ އަތޮޅު ޗެންޕިއަން ކަނޑުހުޅުދޫ 1-0 އިން ބަލިކޮށް މުބާރާތުން އެޓީމު ކަޓުވާލާފައެވެ. މިގްރޫޕްގެ ދެވަނައަށް ގޮސްފައިވަނީ ނިލަންދޫއެވެ.

އަތޮޅުގެ ގްރޫޕް ބީގެ މެޗުތަކަށް ބަލާއިރު ދެއްވަދޫ މާމެންދޫ އާއި 3-3 އިން އެއްވަރުވެފައިވާއިރު، ވިލިނގިލި އާއި ކޮލަމާފުށި ބައްދަލުކުރި ފޯރިގަދަ މެޗު ނިމުނީ 3-4 އިން ވިލިނގިލި މޮޅުވެގެންނެވެ. މިގްރޫޕް ގެ އެއްވަނައިގައި ދެއްވަދޫ އޮތްއިރު، ދެވަނައިގައި އޮތީ ވިލިނގިއްޔެވެ.

އަތޮޅު ބުރުގެ ސެމީގައި ވާދަކުރާނީ ގްރޫޕް އޭގެ އެއްވަނަ ދާންދޫ އާއި ގްރޫޕް ބީގެ ދެވަނަ ވިލިނގިއްޔެވެ. އަދި ސެމީގެ ދެވަނަ މެޗުގައި ވާދަކުރާނީ ގްރޫޕް ބީ ގެ އެއްވަނަ ދެއްވަދޫ އާއި ގްރޫޕް އޭގެ ދެވަނަ ނިލަންދޫއެވެ.