އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އާ ގުޅިގެން ނުކުޅެދުންތެރިކަން ހުންނަ ފަރާތްތަކަށް ހިންގި އިނަޓަރންޝިޕް ޕްރޮގްރާމް 4 ޒުވާނަކު ފުރިހަމަކޮށްފިއެވެ.

އިންޓާންޝިޕް ފުރިހަމަކުރި 4 ފަރާތުގެ ތެރެއިން 1 ފަރާތަކަށް ވަނީ އެމްއޭސީއެލްގެ ދާއިމީ ވަޒީފާ ހަމަޖެހިފައެވެ.

މިއީ ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތުތައް ފަހިކޮށްދިނުމަށް ސަރުކާރުން ކުރަމުންދާ މަސައްކަތުގެ ތެރެއިން ހާޞިލުކުރެވުނު މުހިންމު ކާމިޔާބީއެއްކަމަށް އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާއިން ފާހަގަކުރެއެވެ.

އަދި މިފަދަ އެހެނިހެން ފުރުޞަތުތައް ފަހިކޮށްދިނުމަށް ކަމާބެހޭ ފަރާތްތަކާއި ގުޅިގެން މަސައްކަތް ކުރަމުންދާކަމަށްވެސް އެ ވުޒާރާއިން ވިދާޅުވެއެވެ.

މި އިންޓާންޝިޕް ޕްރޮގްރާމަކީ އިޖުތިމާޢީ ތަރައްޤީއާއި ބެހޭ ވުޒާރާއާއި އެމް.އޭ.ސީ.އެލްއާ ދެމެދު 2024 ވަނަ އަހަރުގެ ޖޫން މަހު ސޮއިކުރި އެއްބަސްވުމުގެ ދަށުން ފެށި ޕްރޮގްރާމެކެވެ. މި ޕްރޮގްރާމްގެ ދަށުން ނުކުޅެދުންތެރިކަން ހުންނަ 4 ޒުވާނަކަށް ވެލާނާ އިންޓަރނޭޝަނަލް އެއަރޕޯޓުގައި ހުންނަ އެމް.އޭ.ސީ.އެލްގެ އިދާރާގައި މަސައްކަތް ކުރުމުގެ ފުރުޞަތު ދީފަވެއެވެ.

އެގޮތުން އެޗްއާރް އަދި އެޑްމިން ދާއިރާއާއި ލަރނިން އެންޑް ޑިވެލޮޕްމަންޓް، ކޯޕަރޭޓް އަދި ޓްރާންސްޕޯޓް ދާއިރާ ތަމްރީންތައް ދީފައިވެއެވެ.