ސިޔާސީ ޕާޓީތަކުގެ ދަފްތަރަށް ޝަކުވާ ހުށަހެޅުމުގެ ފުރުސަތު އިލެކްޝަންސް ކޮމިޝަން (އީސީ) އިން މިއަދު ހުޅުވާލައިފި އެވެ.

އިލެކްޝަންސް ކޮމިޝަނުން ބުނީ މިދިޔަ ޑިސެމްބަރު މަހުގެ 31 ގެ ނިޔަލަށް އެކޮމިޝަނަށް ލިބުނު ފޯމުތައް ދަފްތަރުކޮށްފައިވާ ކަމަށެވެ. އެ ލިސްޓަށް ޝަކުވާ ހުށަހަޅަން އަންނަ މަހުގެ 10 ވަނަ ދުވަހާ ހަމައަށް ފުރުސަތު ހުޅުވާލާފައިވާ ކަމަށް އެކޮމިޝަނުން ބުނެ އެވެ.

Ad by Hajj Corporation

ޝަކުވާ ހުށަހަޅަން ޖެހޭނީ އިލެކްޝަން ޕޯޓަލް (my.elections.gov.mv) ނުވަތަ ޝަކުވާ ޕޯޓަލް (ppr.elections.gov.mv) މެދުވެރިކޮށެވެ.

ސިޔާސީ ޕާޓީތަކުގެ ދަފްތަރަށް ޝަކުވާ ހުށަހަޅަން ހުޅުވާލިއިރު، ބައެއް މީހުންގެ މައުލޫމާތު ވަގަށް ނަގައިގެން އެކި ޕާޓީތަކަށް ވައްދާފައިވާ ކަމުގެ ޝަކުވާތައް ވަނީ ބޮޑުވެފަ އެވެ.

ސިޔާސީ ޕާޓީތަކުގެ ތެރެއިން އެންމެ މެމްބަރުން ގިނަ ޕާޓީ އަކީ ވެރިކަން ކުރާޕީޕަލްސް ނެޝަނަލް ކޮންގްރެސް (ޕީއެންސީ) އެވެ.

އިލެކްޝަންސް ކޮމިޝަނުން ހާމަކުރިގޮތުގައި، ފާއިތުވި އަހަރުގެ ނިޔަލަށް ރާއްޖޭގެ ސިޔާސީ ޕާޓީތަކުގެ ދަފްތަރުގައި އެންމެ ގިނަ މީހުން ހިމެނެނީ ޕީއެންސީގައެވެ. އެއީ ޖުމްލަ 68,968 މެމްބަރުންނާއެކުއެވެ. ފާއިތުވި އަހަރުގެ ސެޕްޓެމްބަރު މަހުގައިވެސް ސިޔާސީ ޕާޓީތަކުގެ ދަފްތަރު ހާމަކޮށްފައިވާއިރު، އޭރު ޕީއެންސީގެ ދަފްތަރުގައި ތިބީ 28،000 އެއްހައި މެންބަރުންނެވެ.

އެގޮތުން މިއީ، ރާއްޖޭގެ ތާރީޚުގައި ވެސް އެންމެ ގިނަ އަދަދެއްގެ މެންބަރުން ނިސްބަތްވާ ސިޔާސީ ޕާޓީއެވެ.

އީސީގެ ތަފާސްހިސާބުތައް ދައްކާގޮތުން، ރާއްޖޭގެ އެންމެ ދުވަސްވީ، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގައި މިހާރު ތިބީ 43،755 މެންބަރުންނެވެ.