ރާއްޖެއަށް މަސްތުވާތަކެތި އެތެރެކުރި ބްރެޒިލް މީހާ ޝަރީއަތް ނިމެންދެން ބަންދުކޮށްފިއެވެ.

އޭނާ ޝަރީއަތް ނިމެންދެން ބަންދުކުރުމަށް ނެރުނު ބަންދު އަމުރުން އެނގޭ ގޮތުގައި ލެންޑަސަން ބަންދުގައި ބެހެއްޓުމަށް ފުލުހުން އެދިފައިވަނީ 30 ދުވަހަށް ނަމަވެސް ކޯޓުން ނިންމީ ޝަރީއަތް ނިމެންދެން ބަންދުކުރުމަށެވެ.

މި މައްސަލައިގައި ޝަރީއަތް ނިމެންދެން ބަންދުކޮށްފައިވަނީ ބްރެޒިލް އަށް ނިސްބަތްވާ އުމުރުން 44 އަހަރުގެ ލެންޑަސަން ޑިޕައުލޯ ގާސިއާ އެވެ.

އެ ބަންދު އަމުރުން އެނގޭ ގޮތުގައި ލެންޑަސަންގެ ހަށިގަނޑު މަސްތުވާތަކެތި ކަމަށް ޝައްކު ކުރެވޭ 107 ރަބަރު ބުލެޓު ފެނިފައިވާއިރު މިތަކެތީގެ ބަރުދަން ކިލޯއަށްވުރެ ގިނަކަން ފުލުހުން ފާހަގަކުރާ ކަމަށް ބުނެފައިވެއެވެ.

އަދި މި މައްސަލައިގައި އިތުރު ފަރާތްތަކެއް ބައިވެރިވެފައިވާ ކަމަށާއި މި މައްސަލައިގައި ކޮންޓްރޯލް ޑެލިވަރީ އޮޕަރޭޝަނެއް ކުރިއަށް ގެންގޮސް ދިވެއްސަކު ހައްޔަރުކޮށްފައިވާ ކަމަށް ފުލުހުން ފާހަގަކޮށްފައިވާ ކަމަށް ފުލުހުން ބުނެފައިވެއެވެ.