ރާއްޖޭގެ ކަނޑުގެ ސަރަހައްދަށް ވަދެއުޅޭ ބޭރުގެ ގޮތްނޭނގޭ އުޅަނދުފަހަރަށް މަސްވެރިންނާ އަދި ދަތުރުފަތުރުކުރާ ފަރާތްތަކުން ނާރަން ބާރަށު ކައުންސިލުން އިލްތިމާސްކޮށްފި އެވެ.

މިފަހަކަށް އައިސް ރާއްޖޭގެ ސަރަހައްދަށް ވަދެ އުޅޭ ބޭރުގެ ގޮތްނޭނގޭ އުޅަނދުފަހަރަށް މަސްވެރިންގެ އުޅަނދުފަހަރުން އަރާ އެފަދަ އުޅަނދުތައް ހިފަހައްޓަމުން ގެންދާ ކަމަށް، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާ ހަވާލާދީ ބާރަށު ކައުންސިލުގެ އިދާރާއިން މިއަދު ނެރުނު އިއުލާނެއްގައި ބުނެފައިވެއެވެ.

Ad by Hajj Corporation

މިދިޔަ މަހުގެ ފަހުކޮޅު ވެސް ކަނޑުމަތިން ބެހިގެން އައި ބަޔަކު ފުވައްމުލަކު ސިޓީ ހުޅަނގު އުތުރުން 10 ވަރަކަށް މޭލު ބޭރުން ވަނީ ހިފަހައްޓާފަ އެވެ. އެމްއެންޑީއެފުން ބުނެފައި ވަނީ ތިން މީހުން ތިބި ޑިންގީ ހިފެހެއްޓީ ޝައްކުވެގެން ކަމަށެވެ. އޭގައި ތިބީ ސޯމާލިއާ މީހުން ކަމަށް ޝައްކު ކުރެވޭ ކަމަށް ވެސް ބުނެފައިވެ އެވެ.

ބާރަށު ކައުންސިލުން ހާމަކޮށްފައިވާ ގޮތުގައި އެފަދަ އުޅަނދުފަހަރު ރާއްޖޭގެ ކަނޑުގެ ސަރަހައްދުން ފެނިއްޖެ ނަމަ އެފަދަ އުޅަނދުފަހަރަށް އެރުމުގެ ބަދަލުގައި ލަސްނުކޮށް ކޯސްޓްގާޑަށް ނުވަތަ ސަރުކާރުގެ ކަމާ ގުޅުންހުރި އިދާރާތަކަށް އެ މައުލޫމާތު ހިއްސާކުރަން އަތޮޅު ކައުންސިލުން އަންގާފައިވާ ކަމުގަ އެވެ.