އެހެން ގައުމުތަކުގެ ލާމަރުކަޒީ ނިޒާމުގެ މަސައްކަތްތައް ކުރިއަށްދާ ގޮތް ދެނެގަތުމަށް ބާއްވާ ބައްދަލުވުމެއްގައި ބައިވެރިވެވަޑައިގަތުމަށް، ސިޓީތަކާއި އިދާރީ ދާއިރާތަކާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު މިއަދު ފިލިޕީންސްއަށް ފުރާވަޑައިގަންނަވައިފިއެވެ.

ފިލިޕީންސްގެ ވެރިރަށް މަނީލާގައި ބޭއްވުމަށް ހަމަޖެހިފައިވާ ބައްދަލުވުމުގައި ބައިވެރިވެވަޑައިގަތުމަށް ފުރާވަޑައިގެންނެވުމުގެ ކުރިން މިއަދު މީޑީޔާތަކަށް ދެއްވި އިންޓަވިއުއެއްގައި ވަޒީރު އާދަމް ޝަރީފް ވިދާޅުވި ގޮތުގައި، އެ ބައްދަލުވުމުގައި ލާމަރުކަޒީ ނިޒާމާ ގިނަ ކަންކަމާ ގުޅޭ ގޮތުން މަޝްވަރާކުރާނެއެވެ.

އެގޮތުން ކޮމިއުނިޓީ ޕާޓިސިޕޭޝަން އަދި ގުޑް ގަވަނާސްްގެ އިތުރުން، ޓްރާންސްޕޭރެންސީ އާއި ސަސްޓެއިނެބަލް ޑެވެލޮޕްމެންޓް ފަދަ މުހިންމުކަންކަމާ ގުޅޭ ގޮތުން މަޝްވަރާކުރާނެ ކަމުގައި ވަޒީރު ވިދާޅުވިއެވެ.

ވަޒީރު ވިދާޅުވި ގޮތުގައި އެ ދަތުރުފުޅުގެ އެންމެ މުހިންމު އަމާޒަކީ ދުނިޔޭގެ އެހެން ގައުމުތަކުގަ ލާމަރުކަޒީ ނިޒާމް ހަރުދަނާ ކުރަމުންދާ މަސައްކަތްތަކުގެ ސަކްސެސް ސްޓޯރީ ދެނެގަނެ، އެ ކަންކަމުގެ އަލީގައި ރާއްޖޭގެ ލާމަރުކަޒީ ނިޒާމު ހަރުދަނާ ކުރުމަށްޓަކައި ކުރެވޭނެ މަސައްކަތްތަކަކީ ކޮބައިތޯބަލައި، މަޝްވަރާކުރުމެވެ.

އަދި ދުނިޔޭގެ އެހެން ގައުމުތަކުގައި ލާމަރުކަޒީ ނިޒާމު ހަރުދަނާކުރުމަށްޓަކައި ކުރާ މަސައްކަތްތަކާއި، އެ ނިޒާމުގައި ދިމާވާ ގޮންޖެހުންތައް ހޯދައި، އެ ގޮންޖެހުންތަކުން އަރައިގަނެ އެ ގައުމުތަކުން ކުރި މަސައްކަތް ވެސް މި ދަތުރުގެ ތެރެއިން ދެނެގަނެވޭނެ ކަމުގައި ވަޒީރު ވިދާޅުވިއެވެ.

ވަޒީރު އެ ބައްދަލުވުމުގައި ބައިވެރިވެވަޑައިގަންނަވާއިރު، ޔޫއެންޑީޕީގެ މާލީ އެހީތެރިކަމާއެކު ބާއްވާ މި ބައްދަލުވުމުގައި އެހެން ގައުމުތަކުގެ ގިނަ ބޭފުޅުން ބައިވެރިވާނެއެވެ.