ދައުލަތުން ވަކި ބަޖެޓެއް ދީގެން ކައުންސިލްތައް ބާރުވެރިކުރުމަށް ވުރެ ވަސީލަތްތައް ބޭނުންކޮށްގެން އެ ރަށަކަށް ލިބޭ އާމްދަނީ އިތުރުކުރެވޭނެ ގޮތްވުން މާ މުހިންމު ކަމަށް ސިޓީތަކާއި އިދާރީ ދާއިރާތައް ހިންގުމާ އާއްމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

ދައުލަތުގެ މީޑިއާގައި ވާހަކަފުޅު ދައްކަވަމުން މިނިސްޓަރ ވިދާޅުވީ ދައުލަތުން ވަކި ބަޖެޓެއް ދީގެން ކައުންސިލްތައް ބާރުވެރިކުރުމަށް ވުރެ މުހިންމީ ކައުންސިލްތައް އޭގެ ޒާތުގައި މުސްތަޤިއްލުކަމާއެކީގައި، ރަށުގެ ވަސީލަތްތައް ބޭނުންކޮށްގެން އެ ރަށަކަށް ލިބޭ އާމްދަނީ އިތުރުކުރެވޭނެ ގޮތެއް ވުންކަމަށެވެ.

Ad by Hajj Corporation

ލާމަރުކަޒީ ނިޒާމަކީ އޭގެ ޒާތުގަ ރައްޔިތުން ވަރަށް ބޮޑަށް ބަލައިގަނެފައި އޮތް ނިޒާމެއް ކަމަށާއި ޚާއްޞަކޮށް ފެހި ޤާނޫނު އަސާސީން ދިވެހިންނަށް ލިބުނު އެންމެ ރަނގަޅު ހަދިޔާއަކީ ލާމަރުކަޒީ ނިޒާމުކަމަން ވަޒީރު ފާހަގަކުރެއްވިއެވެ.

ކައުންސިލްތައް މާލީ ގޮތުން ބާރުވެރި ކުރުވުމަކީ މި ސަރުކާރުގެ މުހިންމު ސިޔާސަތެއް ކަމަށާއި ލާމަރުކަޒީ ނިޒާމު ތައާރަފުކުރުމަށް ފަހު މި ވޭތުވެ ދިޔަ 15 ވަރަކަށް އަހަރުތެރޭ ފަޅުރަށްތައް ކައުންސިލްތަކަށް، ދެއްވި ރައީސަކު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނޫނީ ނެތްކަމަށް ވަޒީރު ވިދާޅުވިއެވެ.

ދައުލަތުން ވަކި ބަޖެޓެއް ދީގެން ކައުންސިލްތައް ބާރުވެރިކުރުމަށް ވުރެ ވަސީލަތްތައް ބޭނުންކޮށްގެން އެ ރަށަކަށް ލިބޭ އާމްދަނީ އިތުރުކުރެވޭނެ ގޮތްވުން މާ މުހިންމު ކަމަށް ވަޒީރު ވިދާޅުވިއިރު މާލީގޮތުން ކައުންސިލްތައް ބާރުވެރިކުރުވުމަށްޓަކައި، ފަޅުރަށްރަށް ކައުންސިލްތަކާ ހަވާލުކުރުމުގެ މަސައްކަތުގެ ދަށުން، ދ. އަތޮޅު ކައުންސިލާ ހަވާލުކޮށްފައިވާ އެ އަތޮޅު މިނިމަސްގަލީގައި ދަނޑުވެރިކަން ކުރުމަށް 21 އަހަރަށް ވަނީ ކުއްޔަށްދީފައެވެ.

ނިމަސްގަލި ކުއްޔަށްދީފައިވަނީ އަހަރަކު 250،000 ރުފިޔާ ކައުންސިލަށް ލިބޭ ގޮތަށެވެ.

ކައުންސިލަށް ލިބޭ ފަޅުރަށްތައް ތަރައްޤީކޮށް، އޭގެ މަންފާ ރައްޔިތުންނަށް ލިބޭނެ ގޮތް ހެދުމުގެ ފުރުޞަތު ސަރުކާރުން ފަހިކޮށްދީފައިވާއިރު ސަރުކާރުން މިފަދަ މަސައްކަތްތައް ކުރިއަށް ގެންދަނީ ރާއްޖޭގެ ރަށްތަކުގެ ކައުންސިލްތައް މާލީގޮތުން ބާރުވެރިކުރުވައި، ރަށްރަށުގެ ތަރައްޤީއަށް ބޭނުންވާ ވަސީލަތްތައް ހޯދައިދިނުމަށެވެ. މިކަމުގެ ސަބަބުން ރަށްރަށުގެ އިޤްތިޞާދީ ޙަރަކާތްތައް  އިތުރުވެގެންދާނެ ކަމަށް ބެލެވެއެވެ.

ރާއްޖޭގެ ހުރިހާ ކައުންސިލަކަށް ވެސް ފަޅު ރަށެއް ހޯދުމުގެ ފުރުސަތު ލިބޭނެ ގޮތް ހެދުމަކީ ރައީސް ޑރ. މުހައްމަދު މުއިއްޒުގެ ސިޔާސަތެކެވެ.