ރޯދަ ހަދިޔާ ބެހުމުގެ ކަންކަން ކުރިއަށް ދިޔައީ ރަނގަޅަށް އިންތިޒާމުވެގެން ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު ވިދާލުވެއްޖެއެވެ.

މިނިސްޓަރ މިފަަދައިން ވިދާޅުވީ، ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބުދެއްވަމުންނެވެ.

Ad by Hajj Corporation

މިނިސްޓަރ ވިދާޅުވީ، ރަށްރަށުގެ ގޭބިސީތަކާއި ހާލަތަކީ އެ ރަށެއްގެ ކައުންސިލަތަކަށް ވަރަށް ރަނގަޅަށް އެނގޭނެ ކަންކަމަށްވާތީ، ދުރާލާ ކައުންސިލްތަކުން ގޭބިސީތަކުގެ ލިސްޓު ހޯދި ކަމަށެވެ. އަދި މާލޭގައި މަސްދަޅުކޭސް ދޫކުރީ ގޭބިސީތައް އެންމެ ރަނގަޅަށް ވަކިކުރެވޭނެ ގޮތަކީ މީޓަރު ނަމްބަރުން ކަމަށްވާތީ އެގޮތުގެ މަތިން ކަމަށް މިނިސްޓަރ ވިދާޅުވިއެވެ. މިއީ މީގެ ކުރީގައި ސަރުކާރުތަކުން ވެސް އަމަލުކުރި އުސޫލުގެ ގޮތުގައި އެމަނިމުފާނު ފާހަގަކުރެއްވިއެވެ.

މިނިސްޓަރ ޔަގީންކަން ދެއްވި ގޮތުގައި، ރޯދަ ހަދިޔާ ބެހުމުގެ ކަންކަން ކުރިއަށް ދިޔައީ ކައުންސިލްތަކާ ގުޅިގެން، ރަނގަޅަށް އިންތިޒާމުވެގެންނެވެ.

ރަމަޟާންމަހު ކޮންމެ ގޭބީސީއަކަށް މަސްދަޅު ކޭހެއް ހަދިޔާކުރުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިޢުލާންކުރެއްވީ، ސަރުކާރަށް އެއް އަހަރު ފުރުމުގެ ކާމިޔާބީ ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

މިކަން ތަންފީޛުކުރި މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްއިން މާލޭ ސަރަހައްދުގައި މަސް ދަޅު ކޭސް ދޫކުރީ ޓޯކަން ނަމްބަރުތަކަށް، ކޮންމެ ރެޔަކު 300 ޓޯކަންއަށް މަސްދަޅުކޭސް ދޫކުރާ އުސޫލުންނެވެ.

ރޯދަމަހަށް ޚާއްޞަކޮށްގެން ގޭބިސީތަކަށް ބަހާފައި ވަނީ 48 ދަޅުގެ މަސްދަޅު ކޭހެވެ. މި އަހަރު 118673 މަސްދަޅު ކޭސް ރޯދަމަސް ފެށުމުގެ ކުރިންބަހައި ނިންމިއެވެ.

މިދިޔަ އަހަރުގެ ރަމަޟާންމަހުވެސް ސަރުކާރުން ވަނީ، ރޯދަ ހަދިޔާގެ ގޮތުގައި 111،231 މަސްދަޅު ކޭސް ހަދިޔާކޮށްފައެވެ. އެއީ، މާލޭގެ ގޭބިސީތަކަށް ހަދިޔާ ކުރި 50،519 މަސްދަޅު ކޭހާއި، އަތޮޅު ތެރޭގެ ގޭބިސީތަކަށް ހަދިޔާ ކުރި 60،712 މަސްދަޅު ކޭހެވެ.