ލާމަރުކަޒީ ނިޒާމު އިތުރު ހަރުފަތަކަށް ގެންދިއުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ދެވަނަ ދައުރަކަށް ހޮވަންޖެހޭ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު، އާދްމް ޝަރީފް އުމަރު ވިދާޅުވެއްޖެއެވެ.

ވަޒީރުގެ ރަސްމީ 'އެކްސް' އެކައުންޓުގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ލާމަރުކަޒީ ނިޒާމު ހަރުދަނާކޮށް، ރައްޔިތުން ބާރުވެރި ކުރުމުގެ ސަޤާފަތެއް އުފެެއްދުމަށްޓަކައި ރައީސްޑރ. މުޢިއްޒު ގެންދަވަނީ ވަރަށް ހަރުދަނާ މަސައްކަތްތަކެއް ކުރައްވަމުން ކަމަށެވެ. އަދި މި މަސައްކަތްތައް އިތުރު ހަރުފަތަކަށް ގެންދިއުމަށް އެމަނިކުފާނަށް އިތުރު ދައުރަކަށް ހޮވަންޖެހޭ ކަމަށެވެ.

ވަޒީރު މިހެން ވިދާލުވެފައި ވަނީ މިއަދު އއ. އުކުޅަހުގައި ރާއްޖޭގެ ލާމަރުކަޒީ ނިޒާމު ހަރުދަނާކޮށް، ރައްޔިތުންގެ ބާރުވެރިކަން އިތުރުކުރުމުގެ ސަގާފަތެއް އުފެެއްދުމަށް ޓަކައި، 'ރަށްވެހީންގެ ސައްލާ' ގެ ނަމުގައި ފޯރަމް ފެށުމާއި ގުޅިގެންނެވެ.

3 ދުވަހުގެ މުއްދަތަށް އއ. އުކުޅަހުގައި ކުރިއަށް ގެންދާ މި ފޯރަމްގައި، އެކި މަޢުލޫތަކާއި ގުޅޭގޮތުން މަޝްވަރާކުރަން ވަނީ ހަމަޖެހިފައެވެ. މާދާމާ ރޭގެ ނިޔަލަށް ކުރިއަށްދާ މި ބައްދަލުވުމުގައި، ކައުންސިލްތަކުގެ ބައެއް ރައީސުންނާއި، މެންބަރުންނާއި އަދި އެސްޖީންނާއެކު ޖުމްލަ 55 ބޭފުޅަކު ބައިވެރިވެލައްވައެވެ.