ބަންކަރިންގެ ޚިދުމަތް ދިނުމަށް ބޭނުންކުރާ ފުރަތަމަ ބޯޓު "އެމްޓީ މެރިން އޭންޖަލް" ކުޅުދުއްފުށި ސިޓީގައި މިއަދު ބަނދަރުކޮށްފިއެވެ.

ރާއްޖޭގައި އެ ޚިދުމަތްދޭނެ އެސްޓީއޯއިން ބުނި ގޮތުގައި، އެ ބޯޓަކީ 4،000 މެޓްރިކް ޓަނުގެ ތެޔޮ އުފުލޭ ބޯޓެކެވެ.

މީގެ އިތުރުން، އެ ޚިދުމަތަށް ބޭނުންކުރާ ދެވަނަ ބޯޓު ވެސް އަންނަ ހުކުރު ދުވަހު ރާއްޖެއަށް އަންނާނެ ކަމަށް އެސްޓީއޯ އިން ބުންޏެވެ. އެ ބޯޓަކީ 3،200 މެޓްރިކް ޓަނުގެ ތެޔޮ އުފުލޭނެ ބޯޓެކެވެ.

ރާއްޖޭގައި ރަސްމީކޮށް ބައިނަލްއަގުވާމީ ބަންކަރިންގެ ޚިދުމަތް ފެށުމަށް ނިންމާފައިވަނީ މި މަހުގެ 20 ވަނަ ދުވަހުއެވެ. އެގޮތުން އެ ދުވަހު ފުރަތަމަ ބޯޓަށް ތެޔޮ ވިއްކަން ނިންމާފައިވާ ކަމުގައި އެ މަސައްކަތްކުރިއަށް ގެންދާނެ، އެސްޓީއޯ އިން ބުންޏެވެ.

އެސްޓީއޯ އާއި އެމްޕީއެލް ގުޅިގެން ބައިނަލްއަގުވާމީ ބަންކަރިންގެ ޚިދުމަތް ފެށުމަށް ކުރިން ނިންމާފައި އޮތީ މި ހަފްތާގެ ބުރާސްފަތި ވަނަ ދުވަހުއެވެ. ނަމަވެސް މޫސުން ގޯސްވެ އުޅަނދުތައް އައުން ލަސްވުމުން އެ ތާރީޚު ފަސްކުރީއެވެ.

​ރާއްޖެ އޮންނަ ސަރަހައްދުގެ ގޮތުން އިހަވަންދިއްޕޮޅު ކައިރިން ދުވާލަކު 300 އަށް ވުރެ ގިނަ އާގު ބޯޓު ދަތުރުކުރާ ކަމަށް ސަރުކާރުން ބުނެފައިވެއެވެ. އެހެންކަމުން ބަންކަރިންގެ ޚިދުމަތާއެކު، ރާއްޖޭގެ އިގްތިސާދަށް އެތައް މިލިއަން ޑޮލަރެއް ވަންނާނެ ކަމުގައި ސަރުކާރުން ދެކެއެވެ. އެގޮތުން އެ މަސައްކަތް ފަށަނީ ވެސް ރާއްޖޭގެ އިގްތިސާދު ސިންދަފާތުކޮށް، ފަތުރުވެރިކަން ނޫން އެހެން ދާއިރާތަކުން ވެސް ރާއްޖެއަށް ލިބޭ ޢާމްދަނީ އިތުރުކުރުމުގެ ބޭނުމުގައެވެ.