ސޯޝަލް މީޑިއާގައި އަބުރުކަތިލަން މަސައްކަތްކުރިކަމަށްބުނެ ނެޝަނަލް ޑްރަގް އެޖެންސީ (އެންޑީއޭ) ގެ ސީއީއޯ ލުބްނާ ޒާހިރު ހުސައިން ދައުވާ ކުރަން ނިންމައިފިއެވެ.

އަޙްމަދު ޒަކީ ނަމަކަށް ކިޔާ މީހަކު ފޭސްބުކުގައި ކުރި ޕޯސްޓެއްގައި އޭނާ ވަޒީފާގެ އިންޓަވިއުއަކަށް ދިޔުމުން ލުބުނާ އޭނާއަށް މަލާމާތްކޮށް ފުރައްސާރަކުރެއްވި ކަމަށް ބުނެފައިވެއެވެ.

Ad by Hajj Corporation

ލުބުނާ ވިދާޅުވީ މިހާތަނަށް އިންޓަވިއު ޕެނަލެއްގައި ބައިވެރިވެވަޑައިގެންފައިވަނީ 2011 ގައި އެންޑީއޭގެ ސީއީއޯގެ މަގާމަށް ނެގުމަށް ބޭއްވި އިންޓަވިއު ޕެނަލްގައި އެކަނި ކަމަށެވެ. އަދި އަމިއްލަ ވިޔަފާރީގައި ގެންގުޅެނީ އަންހެނުންކަމުން މިއީ ދޮގު ތުހުމަތެއްކަން ލުބުނާ ފާހަގަކުރެއްވިއެވެ. ލުބްނާ އިތުރަށް ވިދާޅުވީ އޭނާއަކީ މީހުންނަށް މަލާމާތްކޮށް ފުރައްސާރަކުރައްވާ ހިތްވާ ބޭފުޅެއް ނޫން ކަމަށާއި، މިހާތަނަށް އެފަދަ ކަމެއް ކޮށްފައި ނުވާނެ ކަމަށެވެ. އަދި އޭނާ ދަންނަ މީހުންނަށް މިކަން ވަރަށް ރަނގަޅަށް އެނގޭނެ ކަމަށްވެސް ވިދާޅުވިއެވެ.

މީގެ އިތުރުން މި އަމަލަކީ އަބުރާބެހުމުގެ ޢަމަލެއްކަމުން މި ކަމާމެދު ގާނުނީ ފިޔަވަޅު އަޅާނެކަމަށް ލުބުނާ ވަނީ ވިދާޅުވެފައެވެ. ގާނޫނީ ފިޔަވަޅު އަޅާނެކަމަށް ވިދާޅުވުމާއެކު އަޙްމަދު ޒަކީގެ އެކައުންޓުންވަނީ އިތުރު ޕޯސްޓެއްކޮށް ފޭސްބުކުގައި ލިޔާ އެއްޗެހި ހިފައިގެން ކޯޓަށް ދާ މީހަކަށް އެހެންކަމެއް ކުރާނެ ވަގުތެއް ނުވާނެކަމަށެވެ.

ލުބުނާއަކީ އިސްލާމިކް ޔުނިވަސިޓީގެ ޗާންސެލަރު ޑރ. މުޙައްމަދު ޒާހިރު ޙުސައިންގެ ދަރިކަނބަލެކެވެ.