އިޓާލިއަން ސެރީއޭގައި ރޭގައި ފިއޮރެންޓީނާ ބަލިކުރުމަށްފަހު، ތާވަކުގެ އެއްވަނައިގައިވާ ނަޕޮލީއާއި އެއްޕޮއިންޓް ގާތަށް އިންޓަރ މިލާން ޖެހިލައިފިއެވެ. އިންޓަރ މިލާންގެ އަމިއްލަ ދަނޑުގައި ކުޅެވުނު މިމެޗު އެޓީމުން ކާމިޔާބުކުރީ 2-1 އިންނެވެ.

މެޗުގެ ފުރަތަމަ ގޯލުޖަހައި ކުރިހޯދީ އިންޓަރ މިލާނުންނެވެ. މިއީ މެޗުގެ 28 ވަނަ މިނެޓުގައި ފިއޮރެންޓީނާގެ ޑިފެންޑަރ އަތުން ބައިކޮޅަށް ވަތްގޯލެކެވެ. މެޗުގެ 41 ވަނަ މިނެޓުގައި އިންޓަރގެ ޕެނަލްޓީ އޭރިޔާގެ ތެރެއިން އެޓީމުގެ ޑިފެންޑަރ ޑަރމިއަން އަތުގައި ޖެހުނު ބޯޅައެއްގައި ލިބުނު ޕެނަލްޓީއަކުން ފިއޮރެންޓީނާގެ ރޮލާންޑޯ ޖެހި ގޯލެކެވެ. ނަމަވެސް އޭގެ 10 މިނެޓުފަހުން އިންޓަރގެ ފޯވާޑް އަރނޮވިޗް ވަނީ ގޯލުޖަހައި އިންޓަރ އަށް ލީޑުނަގައިދީފައެވެ.

ރޭގެމޮޅާއެކު އިންޓަރ އަށް 24 މެޗުން 54 ޕޮއިންޓް ލިބިފައިވާއިރު، ތާވަލުގެ އެއްވަނައިގައިވާ ނަޕޮލީ އެންމެފަހުން ކުޅުނުމެޗުން އެއްވަރުވެ، އެޓީމަށް ލިބިފައިވަނީ 55 ޕޮއިންޓެވެ. ތާވަލުގެ 3 ވަނަ އިގައި 50 ޕޮއިންޓާއެކު އެޓަލާންޓާ އޮތްއިރު، ފިއޮރެންޓީނާ އޮތީ ތާވަލުގެ 6 ވަނައިގައެވެ.

ނިމިދިޔަ ސީޒަންގެ ސެރީއޭ އިންޓަރ މިލާނުން ކާމިޔާބުކޮށްފައިވާއިރު، ލީގުތަށި އިންޓަރއިން 20 ފަހަރުހޯދާފައިވެއެވެ.