މިއަހަރުގެ ރަމަޟާންމަހު އިތުރުވާ ކަރަންޓް ކެޕޭސިޓީއާ އެއްވަރަށް ޚިދުމަތް ފޯރުކޮށްދިނުމަށް ސްޓެލްކޯއިން އިތުރު ޖަނަރޭޓަރތަކެއް އިންސްޓޯލްކުރުމުގެ މަސައްކަތް ފަށާފައިވާކަމަށް ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވެއްޖެއެވެ.

މި މަސައްކަތް ކުރިއަށްގެންދަނީ ހުޅުމާލޭގައެވެ.

ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ، ރަމަޟާންމަހު ގޭބީސީތަކުން ކަރަންޓް ބޭނުންކުރާ މިންވަރު އިތުރުވަމުން އަންނަކަމަށެވެ.

މިދިޔަ އަހަރުގެ ރަމަޟާންމަހު ޕީކްގައި 114 މެގަވޯޓަށް ކަރަންޓް ބޭނުންކޮށްފައިވާކަމަށާއި މިއަހަރު އެ ކުންފުނިން އަންދާޒާކުރަނީ ޕީކް ގަޑިތަކުގައި 132 މެގަވޯޓަށް ކަރަންޓް ބޭނުންކުރާ މިންވަރު އަރައިގެންދާނެކަމަށް ކަމަށް ފަހުމީ ވަނީ ވިދާޅުވެފައެވެ.

"އަޅުގަނޑުމެން މިވަގުތު ހުޅުމާލޭގައި މިކުރާ މަސައްކަތަކީ ރޯދަމަހާއި ދިމާކޮށް ހޫނު މޫސުންވެސް މިއަންނަނީ އެހެންވީމަ ހޫނު މޫސުމަށް އިތުރު 17 މެގަވޮޓް އިންސްޓޯލްކުރުމުގެ މަސައްކަތް ކުރިއަށް މިދަނީ. އަޅުގަނޑުމެން ތަންކޮޅެއް ލަހުން މި މަސައްކަތް ފެށި ސަބަބަކީ އަޅުގަނޑުމެންނަށް ބިން ލިބުނީ މިދިޔަ ބުރާސްފަތި ދުވަހު. އެހެންނަމަވެސް ސްޓެލްކޯއިން މިވަނީ މިކަމަށް ވާންޖެހޭ ހުރިހައި ތައްޔާރީތައް ވެފައި"

މިކަމަށް ސޮޓެލްކޯއިން މިހާރު އަންނަނީ ތައްޔާރުޖ ވަމުން ކަމަށާއި މި މަސައްކަތްތައް ރަމަޟާންމަސް ފެށުމުގެ ކުރިން ނިމޭނެކަން ފަހުމީ ވަނީ ފާހަގަކުރައްވާފަ އެވެ.

ފަހުމީ ވިދާޅުވީ މިކަމަށް ބޭނުންވާ ޓްރާންސްފޯމަރާއި، އިންޖީނާއި ކޭބަލް މިހާރު އެ ކުންފުންޏަށް ލިބިފައިވާކަމަށެވެ.

ފަހުމީ ވަނީ މި ރޯދަމަހު ކެޕޭސިޓީ ނެތިގެން ކަރަންޓް ކަނޑާލާކަށް ނުޖެހޭނެކަމުގެ ޔަޤީންކަން ދެއްވާފައެވެ.

ސްޓެލްކޯއިން ވަނީ ކަސްޓަމަރުންގެ ކިބައިން ކަރަންޓް އިޤްތިޟާދުކުރުމަށް އިލްތިމާސްކުރައްވާފައެވެ. ޚާއްސަކޮށް ކުރިއަށްއޮތް ރަމާޟާންމަހުގެ ތެރޭގައި ގޭބީސީތަކުން ވަރަށް ބޮޑަށްވެސް ކަރަންޓް އިޤްތިޞާދުކުރުމަށް އެ ކުންފުނިން އެދިވަޑައިގަންނަވައެވެ.