ގަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ކަމާ ބެހޭ އިދާރާތަކުން ކުރާ މަސައްކަތްތަކުގެ ތެރެއިން، މިއަދު ހިންގި އޮޕަރޭޝަނެއްގައި 10 ބިދޭސީއަކު އެ އިދާރާގެ ބެލުމުގެ ދަށަށް ގެންގޮސްފިއެވެ.

މާލޭގެ މައްޗަންގޯޅި ސަރަޙައްދުގައި މިއަދު މެންދުރު ހިންގި އޮޕަރޭޝަނުގައި އިމިގްރޭޝަނުން ވަނީ ޖުމްލަ ތިން ތަނެއް ބަލައި ފާސްކޮށްފައެވެ. އެކަމުގެ ތެރެއިން ފުރަތަމަ ފާސްކުރި ތަނުން ދެ މީހަކު ގެންދިޔައިރު، ދެން ތިބި އެންމެން ބަންދަށް ގެންދިޔައީ ދެވަނައަށް ފާސްކުރި ތަނުންނެވެ.

އެގޮތުން ގުދަނެއް ގޮތަށް ހުރި އެތަން ބަލައި ފާސްކުރިއިރު، ނުތާހިރުކޮށް ހުރި އެ ތަނުގައި ގިނަ އަދަދެއްގެ ބިދޭސީން ތިއްބެވެ. އެތަނުގައި ފަސް ވަރަކަށް ކައްކާ ގޭސް ފުޅި ހުރި އިރު، ކުނިވެ ގިނަ ދުވަސްވެފައި ހުރި ކާބޯތަކެތި ވެސް އެތަނުގައި ހުއްޓެވެ. އެތަނަށް އިމިގްރޭޝަނުގެ އޮފިސަރުން ވަނުމާއެކު، ފިލަން ވެގެން ބިދޭސީއަކު އެތަނުގެ ފުރާޅަށް ވެސް އެރިއެވެ. އެހެން ނަމަވެސް ފުލުހުންގެ އެހީތެރިކަމާއެކު އެ ބިދޭސީން އިމިގްރޭޝަނުގެ ބެލުމުގެ ދަށަށް ގެންދިޔައީއެވެ.

ބިދޭސީން ދިރިއުޅޭ ތަނެއް އިމިގްރޭޝަނުން ބަލައި ފާސްކުރަނިކޮށް -- މެންދުރު ފޮޓޯ

އޭގެ ފަހުން ވެސް އިމިގްރޭޝަނުން އިތުރު ތަނެއް ބަލައި ފާސްކުރިއިރު، އެތަނުން މީހަކު ބަންދަށް ގެންގޮސްފައެއް ނުވެއެވެ. އެހެން ނަމަވެސް އެތަނުން ބަސްތާތަކުގެ ފިޔާ އަދި އަލުވި ފެންނަން ހުއްޓެވެ.

އިމިގްރޭޝަނާއި ފުލުހުން އަދި ކަމާ ގުޅޭ އެހެން އިދާރާތައް ގުޅިގެން މިހާރު ކުރިއަށްގެންދާ އޮޕަރޭޝަނުގައި، އެ އިދާރާއިން ދަނީ ގަވާއިދާ ޚިލާފަށް އުޅޭ ގިނަ ބިދޭސީންތަކެއް ބަންދުކޮށް، ޑީޕޯޓުކުރަމުންނެވެ. އެގޮތުން މިދިޔަ އަހަރުގެ ނޮވެމްބަރުން ފެށިގެން މި އަހަރުގެ އޮގަސްޓުގެ ނިޔަލަށް 3،000 އަށް ވުރެ ގިނަ ބިދޭސީން ޑީޕޯޓުކޮށްފައިވާ ކަމަށް އެ އިދާރާއިން ބުނެއެވެ.