އިނގިރޭސި ޕްރީމިއަރ ލީގުގައި ޓޮޓްނަމް އާއި ވާދަކޮށް މެންޗެސްޓަރ ސިޓީ މޮޅުވެ ތާވަލުގެ 4 ވަނައަށް ޖެހިލިއިރު، ރެލިގޭޝަނުގެ ބިރުހީވެފައިވާ ޔުނައިޓެޑް ރެލިގޭޝަން ޒޯނުގައިއޮތް އިޕްސްވިޗް އަތުން ހަނިގޮތަކަށް މޮޅުވެއްޖެއެވެ.

ޓޮޓްނަމްގެ އަމިއްލަ ދަނޑުގައި ރޭގައި ކުޅެވުނު މެޗު ސިޓީއިން ކާމިޔާބުކުރީ 1-0 އިންނެވެ. މެޗުގެ ހަމައެނި ގޯލު 12 މިނެޓުގައި ކާމިޔާބުކޮށްދިނީ ހާލަންޑްއެވެ. ރޭގެ މޮޅާއެކު ސިޓީ ވަނީ 5 ވަނައިގައިވާ ޗެލްސީއަށްވުރެ 1 ޕޮއިންޓް އިތުރަށް ހޯދައި، 48 ޕޮއިންޓާއެކު ތާވަލުގެ 4 ވަނައަށް ޖެހިލާފައެވެ.

މީގެއިތުރުން މެންޗެސްޓަރ ޔުނައިޓެޑް ވަނީ ތާވަލުގެ 18 ވަނައިގައިވާ އިޕްސްވިޗް އަތުން ހަނިގޮތަކަށް 3-2 އިން މޮޅުވެފައެވެ. ޔުނައިޓެޑް ގެ އަމިއްލަ ދަނޑުގައި ކުޅެވުނު މިމެޗުގެ ފުރަތަމަ ގޯލަކީ 4 ވަނަ މިނެޓުގައި ޔުނައިޓެޑް ގެ ޑިފެންޑަރ ޑޯރގޫއަށް ހެދުނު ގޯހަކާއި ގުޅިގެން ލިބުނު ބޯޅައަކުން ޖެހިގޯލެކެވެ. ނަމަވެސް މެޗުގެ 22 ވަނަ މިނެޓާއި 26 ވަނަ މިނެޓުގައި ޔުނައިޓެޑް ވަނީ ދެ ގޯލު ޖަހައި މެޗުން ލީޑުނަގާފައެވެ. އިޕްސްވިޗުން ވަނީ ފުރަތަމަ ހާފު ނިމުމުގެ ކުރިން އިތުރު ގޯލެއް ޖަހައި މެޗު އެއްވަރުކޮށްފައެވެ. މެޗުގެ 43 ވަނަ މިނެޓުގައި ޔުނައިޓެޑް ގެ ޑިފެންޑަރ ޑޯރގޫ ކުރި ފައުލަކާއި ގުޅިގެން އޭނާއަށް ވަނީ ރަތްކާޑު ދަށްކައި ދަނޑުން ފޮނުވާލާފައެވެ. ޔުނައިޓެޑް މޮޅުކޮށްދިން ގޯލު ޖަހައިދިނީ އޭގެ 4 މިނެޓުފަހުން ލިބުނު ކޯނަރެއްގައި މެގުއަރ އެވެ.

ރޭގެ މެޗުން މޮޅުވެ ލިބުނު 3 ޕޮއިންޓާއެކު ޔުނައިޓެޑް އޮތީ 27 މެޗުން ލިބުނު 33 ޕޮއިންޓާއެކު ތާވަލުގެ 14 ވަނައިގައެވެ.