ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ރަސްމީ ދަތުރުފުޅެއްގައި ހއ. އިހަވަންދުއަށް ވަޑައިގެންފިއެވެ. އެކަމަނާ އިހަވަންދުއަށް ވަޑައިގަތުމުން ރަށުގެ ރައްޔިތުން ވަނީ ހޫނު މަރުހަބާއެއް ދަންނަވާފައެވެ. 

ރައީސްގެ އަނބިކަނބަލުންނަށް އިހަވަންދޫން ރަސްމީކޮށް މަރުހަބާ ދެންނެވީ ސިއްޙީ ވަޒީރު ޢަބްދުﷲ ނާޡިމް އިބްރާހީމާއި ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު އަޙްމަދު ނަޞީރެވެ.

ހއ. އިހަވަންދޫ ޞިއްޙީ މަރުކަޒުގައި ޑައިލިސިސްގެ ޚިދުމަތް ފެށުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެކެވެ. ރައީސުލްޖުމްހޫރިއްޔާ މިދިޔަ ޖެނުއަރީމަހު އުތުރުގެ އަތޮޅުތަކަށް ކުރެއްވި ދަތުރުފުޅުގެ ތެރެއިން އިހަވަންދޫގެ ރައްޔިތުންނާއެކު ބޭއްވެވި ބައްދަލުކުރެއްވުމުގައި އެމަނިކުފާނު ވަނީ ރަމަޟާންމަހުގެ ކުރިން މި ރަށުގައި ޑައިލިސިސްގެ ޚިދުމަތް ފަށްޓަވާނެކަމުގެ ޔަޤީންކަން އެރަށުގެ ރައްޔިތުންނަށް ދެއްވާފައެވެ. 

ރައީސްގެ އަނބިކަނބަލުންގެ މި ދަތުރުފުޅަކީ އިހަވަންދޫ އާމިނާދިޔޯ ސިއްޙީ މަރުކަޒުގައި ޑައިލިސިސްގެ ޚިދުމަތް ރަސްމީކޮށް ފައްޓަވައިދެއްވުމަށް ކުރައްވާ ދަތުރުފުޅެކެވެ. އެކަމަށްޓަކާ އިހަވަންދޫ ސްކޫލުގައި ބާއްވާ ޚާއްސަ ރަސްމިއްޔާތު މިއަދު ހަވީރު އޮންނާނެއެވެ. މި ރަސްމިއްޔާތަށްފަހު ރައީސްގެ އަނބިކަނބަލުން ސިއްޚީ މަރުކަޒަށް ވަޑައިގެން ޑައިލިސިސް ޔުނިޓްގެ މަސައްކަތްތައް ބައްލަވާލައްވާނެއެވެ. 

ކިޑްނީ ބަލީގައި ޑައިލިސިސް ހަދަންޖެހޭ 10 ޕޭޝަންޓުން މިވަގުތުވެސް މި ރަަށުގައި އެބަތިއްބެވެ. މި ޚިދުމަތް ހޯދުމަށް އެ މީހުން ދާންޖެހެނީ ހއ. ދިއްދޫ ނުވަތަ ކުޅުދުއްފުށި ސިޓީއަށެވެ.